დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლისა ეროვნული ცენტრის დირექტორის, ამირან გამყრელიძის თქმით,დღეს დაფიქსირებული 24 შემთხვევა პანიკის საფუძველს არ იძლევა. ამის შესახებ მან COVID-19-ის ეპიდსიტუაციის შესახებ ბრიფინგზე ისაუბრა.

მისი თქმით, ეს სიტუაცია, გარკვეულწილად, პროგნოზირებადი იყო, რადგან ნებისმიერი შემსუბუქების პოლიტიკას, შესაძლოა, შემთხვევათა რაოდენობის მატება მოჰყვეს.

"ყველა ქვეყანაში ასე გახლდათ, შემსუბუქების პროცესში მოსალოდნელია, რომ შემთხვევათა რაოდენობამ იმატოს. მთავარია, რომ ეს მატება იყოს კონტროლირებადი და მართვადი. ჩვენს ქვეყანაში ეს პროცესი არის სრულიად მართვადი. მოსახლეობას არავითარი პანიკის საფუძველი არა აქვს", — აღნიშნა ამირან გამყრელიძემ.

მისივე განცახდებით, საქართველოს მოსახელობაში შეიქმნა ილუზია, რომ ჩვენთან ვირუსი დამარცხებულია, ეს კი სიმართლეს არ წარმოადგენს.

"ჩვენ არ დაგვიმარცხებია. კორონავირუსის პანდემიის დამარცხება მოხდება ერთიანად, გლობალურად. ეს ვერ მოხდება ცალკეულ ქვეყნებში. კორონავირუსი არის ჩვენთან ერთად და ჩვენ ვცხოვრობთ მასთან ერთად", — განაცხადა გამყრელიძემ.

StopCov-ის სტატისტიკით, 22 ივლისისთვის საქართველოში კორონავირუსის 24 ახალი შემთხვევა დადასტურდა. გარდა ამისა, გამოჯანმრთელდა 4 ადამიანი.

თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, 24 ახალი ინიფიცირებულიდან: 5 არის იმპორტირებული შემთხვევა და სატვირთო მანქანების მძღოლები არიან, 5 შემთხვევა დაავადებულებთან კონტაქტებია, 10 შემთხვევა გარდაბნის რაიონის კვლევისას დადასტურდა, 2 პაციენტის ინფიცირების წყარო კი ჯერ უცნობია და კონტაქტების კვლევა მიმდინარეობს.

ბოლო მონაცემებით, ქვეყანაში კორონავირუსის სულ 1073 შემთხვევაა გამოვლენილი, აქედან 907 ადამიანი უკვე გამოჯანმრთელდა, ხოლო 16 გარდაიცვალა. კარანტინის რეჟიმში რჩება 5 692 პირი, სტაციონარში მეთვალყურეობის ქვეშ — 275. უცხოეთიდან საქართველოში სამკურნალოდ 41 ადამიანი გადმოიყვანეს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: