გიორგი შაქარაშვილის საქმის ერთ-ერთი მოწმე, იაკობ ბრეგვაძე ინციდენტის ღამეს 112-ში რეკავს, უხსნის ადგილმდებარეობას, თუმცა, როგორც ოპერატორი ეუბნება, საპატრულო ეკიპაჟი ვერ პოულობს.

7 ივლისს სამინისტრომ ზარის აუდიოჩანაწერი გაასაჯაროვა, სადაც ისმის, რომ ოპერატორი მისამართის დაზუსტებას ცდილობს:

"მცხეთაში ვარ, მცხეთა-მთიანეთის მიმდებარე ტერიტორიაზე, მალე რომ მოხვიდეთ, შეიძლება?" — ეუბნება იაკობ ბრეგვაძე ოპერატორს და ამატებს, რომ ადგილზე, სადაც ინციდენტი მოხდა, არის ობიექტი "ქებაბ ჰაუსი". ოპერატორმა უთხრა, რომ მისამართი ეკიპაჟს უკვე გადასცა.

იაკობ ბრეგვაძე პირველი ზარის დასასრულს ოპერატორს მეორედ უმეორებს ლოკაციას:

"ბათუმიდან შემოსასვლელი გზა რომ არის მცხეთისკენ, მანდ არის, "ქებაბ ჰაუსი" აწერია. შეგიძლიათ ტელეფონით იპოვოთ".

დროის გაურკვეველი მონაკვეთის შემდეგ, 112 ისევ უკავშირდება ბრეგვაძეს და ამბობს, რომ "მის მიერ გადაცემული ლოკაცია ვერ იპოვეს".

"ქებად ჰაუსი", სწორად მესმის?" — დაწესებულების სახელს მცირე უზუსტობით ეუბნება ოპერატორი ბრეგვაძეს. ამის შემდეგ, ბიჭი დამატებით მანიშნებლად "არაგვის ხიდს" ახსენებს. ის ოპერატორს უხსნის, რომ მანამდე საპატრულო პოლიცია უკვე დაუკავშირდა პირობა მიიღო, რომ მასთან მივიდოდნენ.

"პოლიციამ დამირეკა და მითხრა რომ კაიო და რავიცი აბა, მოვა რო? არ ვიცი, ტიპები არიან არაგვის ხიდზე, რომლებიც არიან იდეაში დამნაშავეები, იმიტომ, რომ მანქანიდან გადმოვიდნენ და დაგვაყარეს, ასე რომ ვთქვათ".

მას შემდეგ რაც ბრეგვაძე იგებს, რომ საპატრულო ეკიპაჟი ჯერ კიდევ ვერ მივიდა მასთან, ოპერატორს სთხოვს, შეტყობინება გააუქმოს.

აუდიოზარის შინაარსი 7 ივლისს შს მინისტრის მოადგილემ, ვლადიმერ ბოცვაძემაც მოჰყვა. მან თქვა, რომ იაკობ ბრეგვაძემ ზუსტი ლოკაცია ვერ დაასახელა და ახსენა "მცხეთა-მთიანების ტერიტორია" და "ერთ-ერთი გაუქმებული ობიექტის სახელწოდება", რაშიც, სავარაუდოდ, "ქებაბ ჰაუსი" იგულისხმა.

ამის შემდეგ მინისტრის მოადგილე ჩამოთვლის ოპერატორისა და საპატრულო ეკიპაჟის რეაგირების დეტალებს:

  • "ოპერატორი ცდილობს, დააზუსტოს ინფორმაცია და ავტომატურ რეჟიმში აგზავნის საპატრულო პოლიციისა და კრიმინალური პოლიციის სამორიგეოში;
  • ამავდროულად, პოლიციის ეკიპაჟები ცდილობენ იაკობ ბრეგვაძის ადგილმდებარეობის დადგენას;
  • [პატრულის თანამშრომლები] გადიან სავარაუდო მიმართულებაზე და ამავდროულად, უკავშირდებიან იაკობ ბრეგვაძეს ადგილის დაზუსტების მიზნით;
  • ეკიპაჟები ვერ პოულობენ ლოკაციას და იძულებული ხდება ოპერატორი, ხელმეორედ დაუკავშირდეს ბრეგვაძეს და დააზუსტოს ლოკაცია".

უცნობია, რა დრო დასჭირდა ყველა ამ მოქმედებას და შეიძლებოდა თუ არა ამ პერიოდში კონფლიქტის დასრულება. მინისტრის მოადგილე აღნიშნავს, რომ მეორე დამაზუსტებელი ზარი 112-ის ოპერატორის ინიციატივით განხორციელდა, რან დროსაც ბრეგვაძემ მას უთხრა, რომ ჩხუბი დასრულდა, ყველა წავიდა და შეტყობინება გააუქმოს.

მინისტრის მოადგილე ამატებს, რომ ამის მიუხედავად, 112 აზუსტებინებს ლოკაციას და საპატრულო პოლიციის ეკიპაჟი აგრძელებს იაკობ ბრეგვაძის ძებნას.

სად არის ქებაბ ჰაუსი?

Kebab house, იგივე ქაბაბის სახლი ღია ტიპის კაფეა, რომელიც იმ სამრეცხაოს გვერდით მდებარეობს, სადაც ხიდიდან გადმოსულ 6 ახალგაზრდას მანქანიდან გადმოსული პირები დაედევნენ. ფოტოგრაფი იაკობ ბრეგვაძე ამბობს, რომ სწორედ ამ ინციდენტს გაექცა და იქვე, კაფის სიახლოვეს მდებარე მიტოვებულ "მწვანესახურავიან" შენობას შეაფარა თავი.

ფოტოზე ზედხედით ჩანს მდინარე არაგვი, ხიდი, რომელიც ექვსმა ახალგაზრდამ ინციდენტამდე გაიარა, წითელსახურავიანი კაფე "ქებაბ ჰაუსი" და მწვანესახურავიანი მიტოვებული შენობა, რომელსაც ფოტოგრაფი, მისი თქმით, თავს აფარებდა.

კაფე "Kebab house" მარტივად იძებნება Google Maps-ის მეშვეობით, თუკი საძიებო ველში მივუთითებთ სიტყვებს "Kebab house Mtskheta", თუმცა უცნობია, 112-ის ოპერატორმა ან პატრულის ეკიპაჟის წევრმა, რამდენად სწორად გაიგეს ობიექტის ზუსტი დასახელება და რა მეთოდებით სცადეს მისი მოძებნა.

Google-ის რუკაზევე მიმაგრებულია კაფისა და მიმდებარე ტერიტორიის ფოტოები, რომლებიც ყველასთვის ხელმისაწვდომია. ერთ-ერთ ფოტოზე ჩანს მიტოვებული შენობაც, სადაც, იაკობ ბრეგვაძის თქმით, იმალებოდა.

კაფის ტერიტორიაზე დგას ხე, სადაც დამაგრებულია სათვალთვალო ვიდეოკამერები. მიუხედავად მინისტრის მოადგილის მტკიცებისა, რომ მოწმემ 112-ის ოპერატორს "გაუქმებული ობიექტი" დაუსახელა, სწორედ ამ კაფის ვიდეოკამერამ დააფიქსირა ღამით მერსედესისა და შემდეგ უკვე ტოიოტა კამრის მარკის ავტომანქანიდან რამდენიმე ადამიანის გადმოსვლისა და ჩხუბის ამსახველი კადრები. ეს ვიდეომასალა პროკურატურამ გაასაჯაროვა.

On.ge ღიად დარჩენილ კითხვებზე პასუხისთვის შინაგან საქმეთა სამინისტროს დაუკავშირდა. უწყებაში არ პასუხობენ კითხვებს, რა დრო გავიდა იაკობ ბრეგვაძესა და 112-ის ოპერატორის სატელეფონო კავშირებს შორის, საბოლოოდ, როგორ იპოვეს საქმის მნიშვნელოვანი მოწმე და იპოვეს თუ არა საერთოდ, რადგან ამ დრომდე არ ვიცით არც ის, ბრეგვაძე მცხეთიდან თბილისში წამოიყვანა მის მიერ გამოძახებულმა ეკიპაჟმა თუ შემთხვევით გაჩერებულმა. სამინისტროში ამ თემაზე დამატებით კომენტარზე უარი გვითხრეს. დღეს უწყებაში გამართულ ბრიფინგზე მინისტრის მოადგილემ თქვა მხოლოდ ის, რომ საპატრულო ეკიპაჟმა შემთხვევის ადგილიდან ბრეგვაძე მას შემდეგ წამოიყვანა, რაც გამოძახება გაუქმებული იყო:

"ეკიპაჟი თბილისი-სენაკი-ლესელიძის გზაზე პოულობს ბრეგვაძეს, იგი განუმარტავს, რომ ადგილი ჰქონდა გარკვეულ დაპირისპირებას, მონაწილე პირები უკვე წავიდნენ და ეკიპაჟს სთხოვს, თბილისამდე წაყვანას. საპატრულო ეკიპაჟის წევრები გარკვეულ კითხვებს უსვამენ და ეს ცალსახად გენერალური ინსპექციის გასარკვევია, რის შემდეგაც სვამენ იაკობ ბრეგვაძეს და მიჰყავთ თბილისში".

19 წლის ფეხბურთელის, გიორგი შაქარაშვილის დაღუპვის საქმეზე გამოძიება გრძელდება. დაკავებულ 17-ვე პირს წინასწარი პატიმრობა აქვს შეფარდებული. მათ ბრალი ორი ან მეტი პირის მიმართ განხორციელებული ჯგუფური ძალადობის, ჯგუფური ძალადობის ორგანიზების და ამავე ძალადობაში მონაწილეობის და ჯგუფურად თავისუფლების უკანონო აღკვეთის ფაქტებზე აქვთ წარდგენილი.

19 წლის გიორგი შაქარაშვილის ცხედარი 4-დღიანი ძებნის შემდეგ 22 ივნისს, მდინარე არაგვში იპოვეს. ბიჭის დაკარგვის შესახებ ოჯახმა პოლიციას 19 ივნისს, 11 საათისთვის შეატყობინა. ისინი იმედოვნებდნენ, რომ გიორგი იმალებოდა და ოჯახს მალე დაუბრუნდებოდა.

შსს აცხადებს, რომ გარდაცვალების მიზეზი სასამართლო-სამედიცინო ექსპერტიზის დასკვნის მიღების შემდეგ დადგინდება, ამით კი, შესაძლოა, საქმეს კვალიფიკაცია შეეცვალოს.