"ნათელაშვილის ფანჩატურში შეკრებილი ე.წ. სამეგობრო, საახლობლო გადაიქცა და ჩამოყალიბდა კრიმინალურ ერთობად", — ასე აფასებს ოპოზიციას ქართული ოცნების დეპუტატი, დავით მათიკაშვილი. მისი თქმით, გერმანიის ელჩზე "შეურაცხმყოფელმა" განცხადებებმა გამოაჩინა, რომ ოპოზიცია პროდასავლური არ არის.

"ყველამ კარგად დაინახა, რომ ვითომ დასავლური ორიენტაცია ამ კრიმინალური პოლიტიკური პარტიების არის შირმა. აბსოლუტურად ყველა განცხადება მიმართულია სწორედ ქართულ-დასავლური პოლიტიკის წინააღმდეგ", — განაცხადა მან.

გერმანიის ელჩმა, ჰუბერტ ქნირშმა განაცხადა, რომ 8 მარტის შეთანხმებაში გიორგი რურუა ნახსენები არ ყოფილა. ევროპული საქართველოს დეპუტატის, გიგა ბოკერიას განცხადებით, გერმანიის ელჩს, ჰურბერტ ქრინშს თანაუგრძნობს, რადგან ის ისევ "შარში გაეხვა". ამავე თემაზე ლეიბორისტული პარტიის ლიდერმა, შალვა ნათელაშვილმა თქვა, რომ ელჩი "ივანიშვილის ლობისტია", მისგან ფინანსდება და გერმანიისგან მისი გაწვევა მოითხოვა.

ელჩის კრიტიკის პასუხად განცხადება გაავრცელა მმართველმა გუნდმა. ქართული ოცნება მიიჩნევს, რომ მათი ვალია ქვეყნის სახელით გერმანიის ელჩს ბოდიში მოუხადონ.

ქართულ ოცნებაში ფიქრობენ, რომ "რაც უფრო ღრმად შევა "რადიკალური ოპოზიცია" მძიმე პოლიტიკურ კრიზისში" მისი უპასუხისმგებლობა კიდევ უფრო გამძაფრდება". მათი აზრით, ეს ქვეყანას გარკვეულ ზიანს მიაყენებს, სწორედ ამიტომ "მყისიერი რეაგირება" აუცილებლად მიაჩნიათ.