პარლამეტში დამოუკიდებელი დეპუტატის, თამარ ჩუგოშვილის თქმით, თანამდებობის პირებს აქვთ შეგრძნება, რომ სახალხო დამცველმა ხელისუფლება უნდა დაიცვას. მან გადაცემა სოფო ზურაბიანის პოლიტიკის ფორმულაში პარლამენტში სახალხო დამცველის ყოველწლიურ ანგარიშზე ისაუბრა, რომელიც ნინო ლომჯარია 25 ივნისს წარადგინა.

როგორც ქართული ოცნების ყოფილი წევრი ამბობს, ნაცვლად იმისა, რომ დეპუტატებს ადამიანის უფლებებზე ესაუბრათ, მათ დეზინფორმაციაზე დაიწყეს საუბარი. მისივე თქმით, დეზინფორმაციისა და პროპაგანდის კუთხით ქვეყანა გამოწვევების წინაშე დგას და სახელმწიფო პოლიტიკაც სუსტია, თუმცა მმართველი პარტიის დეპუტატებმა ეს სულ სხვა კუთხით განიხილეს.

"ეს იყო შემდეგი კუთხიდან, რომ პოლიტიკური ოპონენტები და მედიასაშუალებები გვაკრიტიკებენ და გვიქმნიან პიარულ პრობლემას და ამაში როლს რატომ არ ასრულებთ. წარმოიდგინეთ, რომ სახალხო დამცველი, სახელმწიფო ინსტიტუტი მოდის საკანონმდებლო ორგანოში და ამბობს, რომ პრობლემა გვაქვს ჯანდაცვაში, სასამართლოში, შრომით უფლებებში და შენ, როგორც ხელისუფლების წარმომადგენელი, პასუხობ, რომ მე ვიღაცები მაკრიტიკებენ, დაჩაგრულად ვგრძნობ თავს და დამიცავი.

სახალხო დამცველი არსებობს იმისთვის, რომ სახელმწიფოსგან დაიცვას მოქალაქე. იმ თანამდებობის პირებისგან დაიცვას მოქალაქე, რომელიც შეიძლება იჩაგრებოდეს. შებრუნებული ვითარება გვაქვს — თანამდებობის პირები სთხოვენ სახალხო დამცველს, რომ დაიცვას მოქალაქეებისგან, წარმოუდგენელი ვითარებაა", — აღნიშნა ჩუგოშვილმა.

მისი მოსაზრებით, დეზინფორმაციის კუთხით მმართველი პარტიის ასეთი გააქტიურება საარჩევნო კამპანიის დაწყების მანიშნებელია.

დღეს პარლამენტში დეპუტატები აქტიურად განიხილავდნენ მედიაში დეზინფორმაციის საკითხებს და მაგალითად ოპოზიციურად განწყობილი ტელეკომპანია მთავარი მოჰყავდათ. ფეიქნიუსებთან დაკავშირებით ვიდეოჩართვები დაიწყო თბილისის მერმა კახა კალაძემ, რომელმაც რამდენიმე ტელეკომპანიის სიუჟეტი განიხილა.

გარდა ამისა, POSTV-ში შალვა რამიშვილის გადაცემაში სტუმრობისას დეზინფორმაციაზე საუბარს დიდი დრო პარლამენტის თავმჯდომარემ, არჩილ თალაკვაძემაც დაუთმო.