პარლამენტის დამოუკიდებელი დეპუტატის, მარიამ ჯაშის თქმით, საკონსტიტუციო ცვლილებების მეორე კენჭისყრით მიღებამ დაადასტურა, რომ საპარლამენტო ოპოზიციის სპექტრში ნაციონალური მოძრაობა და ევროპული საქართველო გადამწყვეტი ძალები აღარ არიან.

მისი თქმით, ნებისმიერ პოლიტიკოსს, რომელსაც აქვს პრეტენზია, რომ დემოკრატიულად მოაზროვნე და ქვეყნის ინტერესების გამტარებელია, დღეს უფლება არ ჰქონდა, რომ საკონსტიტუციო ცვლილებების პროექტს გამიჯვნოდა.

"დღევანდელი კენჭისყრით დადასტურდა, რომ ნაციონალური მოძრაობა და ევროპული საქართველო საპარალამენტო ოპოზიციის სპექტრში აღარ არიან გადამწყვეტი ძალები. ქვეყნისთვის მნიშვნელოვანი ნებისმიერი გადაწყვეტილების მიღება შესაძლებელია მათგან დამოუკიდებლად. მე ვფიქრობ, ეს არის პასუხისმგებლობის განაწილების თემა, როდესაც არა მხოლოდ ხელისუფლება აგებს, არამედ საერთაშორისო ასპარეზზე შეიძლება ქვეყანამ გამოუსწორებელი ზიანი მიიღოს. ამიტომ ჩვენ ეს პასუხისმგებლობა ჩვენ ავიღეთ და იმედი, მაქვს, რომ მესამე მოსმენითაც არ ექნება საკონსტიტუციო ცვლილებებს ბარიერი", — განაცხადა ჯაშმა.

პარლამენტმა საკონსტიტუციო ცვლილებებს მეორე მოსმენით მხარი დაუჭირა. კენჭისყრას 119 დეპუტატი ესწრებოდა, ცვლილებებს მხარი 115-მა დაუჭირა, წინააღმდეგი იყო 3. დღევანდელ მოსმენას, წინასგან განსხვავებით, არ ესწრებოდა ევროპული საქართველო. კენჭისყრაში მონაწილეობაზე უარი განაცხადა ნაციონალურმა მოძრაობამაც.

ცვლილებების თანახმად, არსებული საარჩევნო სისტემა უნდა შეიცვალოს და მომავალი მოწვევის პარლამენტში პარტიული სიით 77-ის ნაცვლად 120 დეპუტატს აირჩევენ, მაჟორიტარი კი 73-ის ნაცვლად მხოლოდ 30 იქნება.

პირველ მოსმენაზე ცვლილებებს მხარი 136-მა დეპუტატმა დაუჭირა, 5-მა წინააღმდეგ მისცა ხმა. კენჭირსყრის დაწყებამდე ცნობილი გახდა, რომ ცვლილებებს მხარს არ დაუჭრდნენ: ემზარ კვიციანი, ნატო ჩხეიძე, ბიძინა გეგიძე, დავით ჭიჭინაძე და ალექსანდრე ერქვანია. კენჭისყრაში მონაწილეობა არ მიუღია ნაციონალურ მოძრაობასაც. ასევე, ცნობილი იყო, რომ უმრავლესობის მაჟორიტარი დეპუტატი, კახა ოქრიაშვილი ცვლილებებს მხარს არ დაუჭერდა.

აღნიშნულ შეთანხმებას ოპოზიციამ და ხელისუფლებამ დიპლომატების შუამავლობით ხანგრძლივი მოლაპარაკებების შემდეგ 8 მარტს მიაღწიეს.

ცვლილება შეეხება საარჩევნო ბარიერსაც. ეს იმას ნიშნავს, რომ თუკი აქამდე პარტიას პარლამენტში მოსახვედრად მოსახლეობის 5%-ის მხარდაჭერა სჭირდებოდა, ახალი სისტემით 1%-იანი ბარიერის გადალახვაც საკმარისი იქნება.

კიდევ ერთი საკითხი, რაზეც ოპოზიცია და ხელისუფლება შეთანხმდნენ, ე.წ. 40%-იანი ჩამკეტის შემოღებაა, რაც იმას გულისხმობს, რომ პოლიტიკური ძალა, რომელსაც 40%-ზე ნაკლები მხარდაჭერა ექნება, პარლამენტში კი მოხვდება, მაგრამ მთავრობის დაკომპლექტებას ვერ შეძლებს.

რაც შეეხება ოლქებს, ცნობილია, რომ თბილისში 8 სამაჟორიტარო ოლქი იქნება.

საარჩევნო სისტემაზე მოლაპარაკებები მას შემდეგ დაიწყო, რაც ბიძინა ივანიშვილმა 2019 წლის ივნისში პირობა გასცა, რომ ქვეყანა სრულად პროპორციულ სისტემაზე გადავიდოდა, თუმცა ნოემბერში აღნიშნული ცვლილელები პარლამენტში თავად ქართულმა ოცნებამ ჩააგდო.