ექსპრემიერი გიორგი კვირიკაშვილი აცხადებს, რომ მთავრობის მეთაურის პოსტი Unicef-ის კვლევის შედეგების გამო არ დაუტოვებია და ამის მიზეზად მოყვანა არასერიოზულია.

"მე არა მგონია, ასეთ, რაღაცა თემებზე ღირდეს დეტალური ისა. ნუ ახლა, Unicef-ის კვლევა... არ ვიცი რა გითხრათ ახლა. მიზეზად ამის მოტანა, მგონია, რომ მთლად სერიოზული არ არის", — განაცხადა მან TV პირველთან სატელეფონო ინტერვიუში.

კვირიკაშვილის გადადგომამდე, ქართული ოცნების ოფისში რამდენიმე შეხვედრა გაიმართა. მმართველი გუნდი უარყოფდა, რომ პრემიერის გადადგომის საკითხს განიხილავდნენ და ამტკიცებდნენ, რომ Unicef-ის კვლევაზე მსჯელობდნენ, სადაც ასახული იყო, რომ ქვეყანაში მძიმე მდგომარეობააა და ბავშვები შიმშილობენ. მოგვიანებით, იმაზე საუბარიც დაიწყო, რომ ეს კვირიკაშვილის ეკონომიკურმა პოლიტიკამ გამოიწვია.

სატელეფონო ინტერვიუში კვირიკაშვილმა ასევე განაცხადა, რომ პრემიერობისას პარტიის ლიდერის, ბიძინა ივანიშვილისგან "საკმაოდ დიდი ხარისხის თავისუფლება" ჰქონდა" რაღაც პერიოდში", თუმცა მოგვიანებით, როცა ივანიშვილს რაღაცეები არ მოეწონა, მას წასვლა მოუწია.

"მერე, რაღაც პერიოდში, მას აღარ მოეწონა რაღაცეები, როგორც ყველამ იცის ეს და ის ჩაერია ძალიან აქტიურად და დაბრუნდა პოლიტიკაში.

ძალიან ცდილობენ გააფორმონ, რომ მანამდე დაიქცა ქვეყანა და მერე გამოსწორდა ყველაფერი, მაგრამ თუ კარგად დააკვირდებიან ეს ადამიანები, მთლად ესე არ უნდა იყოს", — განაცხადა მან.

გიორგი კვირიკაშვილი ქართული ოცნების პრემიერმინისტრი იყო 2015 წლის 30 დეკემბრიდან 2018 წლის 13 ივნისის ჩათვლით. კვირიკაშვილი პრემიერ-მინისტრის თანამდებობიდან მალევე მას შემდეგ გადადგა, რაც ბიძინა ივანიშვილი პოლიტიკაში ოფიციალურად დაბრუნდა და პარტიის თავმჯდომარედ დაინიშნა.

მისი წასვლის ერთ-ერთ მთავარ მიზეზად მმართველი გუნდი მოსახლეობაში ჭარბვალიანობასა და ეკონომიკურ რეფორმების არაეფექტურობას ასახელებდა. თავად კვირიკაშვილმა კი თანამდებობის დატოვებისას ხმამაღლა განაცხადა გუნდში არსებულ დაპირისპირებასა და შეუთანხმებლობაზე. იქამდე კი თავისი გადადგომის შესახებ გავრცელებული ცნობები რამდენჯერმე უარყო.