ნაციონალური მოძრაობის წევრი, რომან გოცირიძე ამბობს, რომ პარლამენტში ინიცირებული კანონპროექტი, რომელიც ხელისუფლებას გარკვეულ უფლებებს საგანგებო მდგომარეობის გამოცხადების გარეშე აძლევს, დიქტატორულია.

მისი თქმით, მთავრობის ხელში ეს იქნება რეპრესიების, პოლიტიკური დევნისა და ადამიანების უფლებების შეზღუდვის ინსტრუმენტი.

როგორც გოცირიძე ამბობს, უნდა ჩაიწეროს, რომ ყველა ის ნორმა, რომელიც კანონპროექტშია, პარლამენტთან შეთანხმებას საჭიროებს.

"პარლამენტი ეთიშება ქვეყნისთვის უმნიშვნელოვანესი და ამავე დროს, ძალიან სარისკო გადაწყვეტილებების მიღებას. პარლამენტი ფაქტობრივად ფარ-ხმალს ყრის. დელეგირებას აკეთებს ისეთი უფლებებისა, რომელიც შეუძლებელია, რომ აღმასრულებელ ხელისუფლებას ჰქონდეს ამ ზომით. ფაქტობრივად, მთავრობას მიეცით უფლება, შეზღუდოს გადაადგილება, დაკეტოს ეკონომიკის ყველა დარგი, ჩაკეტოს ადამიანები სახლებში, გააუქმოს კონსტიტუციური უფლება, ადამიანის თავშეყრის და გამოხატვის, ჩაკეტოს ქალაქები და ისე გააკეთოს, რომ პარლამენტს არც კი ჰკითხოს", — აცხადებს გოცირიძე.

პარლამენტში ინიცირებული კანონპროექტის მიხედვით, ხელისუფლებას გარკვეული უფლებები საგანგებო მდგომარეობის გამოცხადების გარეშე ეძლევა. მათ შორისაა მიმოსვლის, საკუთრების, სოციალური ღონისძიების მიზნით თავშეყრის შეზღუდვის შესაძლებლობაც.

კანონპროექტის ავტორი ქართული ოცნების დეპუტატი დიმიტრი ხუნდაძეა. მას ორი კანონის შეცვლა სურს — კანონი საზოგადოებრივი ჯანმრთელობის შესახებ და სისხლის სამართლის საპროცესო კოდექსი.