დღეს მთავრობის ადმინისტრაციასთან ერთი ტრანსგენდერი ქალის აქცია იგეგმებოდა, თუმცა არ შედგა. სამოქალაქო აქტივისტ ნატა ფერაძის ინფორმაციით, გაბრიელას დაემუქრნენ, რომ "ძვლებში გადაამტვრევენ.

"გაამზადა ბანერი წარწერით. მხოლოდ 5 წუთი უნდოდა გამოჩენა. აღარ უნდა მალვა, აღარ უნდა გარიყული ყოფნა, უნდა იცხოვროს სამართლებრივ, დაცულ ქვეყანაში, მაგრამ... მაგრამ ჯოჯოხეთში ვცხოვრობთ. შეუთვალეს, რომ "ძვლებში დაამტვრევენ", თუ გავა. მაინც მიდიოდა.
გადავაფიქრებინეთ", — წერს ფერაძე.

ამ დროისთვის ტერიტორიაზე ჰომოფობიური და ძალადობრივი ჯგუფების ერთ-ერთი ლიდერი, გურამ ფალავანდიშვილი იმყოფება. მასთან ერთად კანცელარიასთან მივიდა კიდევ რამდენიმე ადამიანი.

ისინი ამბობენ, რომ დისტანციის დაცვით დღის ბოლომდე გააგრძელებენ მორიგეობას.

ფოტო: On.ge / სალომე ჩიკვილაძე

ჰომოფობიური ჯგუფები მთელი დღის განმავლობაში ავრცელებდნენ ვიდეოებს, სადაც ჩანს, რომ თბილისის სხვადასხვა უბანში დადიან და "მორიგეობენ", რათა ჰომოფობიის საწინააღმდეგო აქცია არ გაიმართოს.