პოლონეთის საზღვართან ჩამოვარდნილი დრონის გამო, პოლონეთის შეიარაღებული ძალების ოპერატიულმა სარდლობამ ქვეყნის საჰაერო სივრცეში საგანგებო ავიაოპერაცია ჩაატარა. როგორც სარდლობა აცხადებს, აღნიშნული ოპერაცია უკვე დასრულებულია.

"ამოქმედებული მიწისზედა საჰაერო თავდაცვისა და რადარებით დაზვერვის სისტემები სტანდარტულ საოპერაციო საქმიანობას დაუბრუნდნენ", — ნათქვამია განცხადებაში.

ოპერატიულმა სარდლობამ აღნიშნა, რომ "პოლონეთის რესპუბლიკის საჰაერო სივრცის დარღვევა არ დაფიქსირებულა".

"პოლონეთის არმია მუდმივად აკვირდება სიტუაციას უკრაინის ტერიტორიაზე და მუდმივ მზადყოფნაში რჩება პოლონეთის საჰაერო სივრცის უსაფრთხოების უზრუნველსაყოფად", – დასძინა სარდლობამ.

მანამდე, დასავლეთ უკრაინაზე რუსეთის თავდასხმასთან დაკავშირებით, პოდკარპატისა და ლუბლინის მცხოვრებლებს განგაშის სიგნალი გაეგზავნათ: "ყურადღება! რუსეთის საჰაერო თავდასხმა უკრაინის ტერიტორიაზე. სიტუაცია მონიტორინგის ქვეშაა. პოლონეთის საჰაერო ძალები პოლონეთის საჰაერო სივრცეში მოქმედებენ. ელოდეთ შემდგომ განცხადებებს".

ასევე გავრცელდა გაფრთხილება, რომელიც მაცხოვრებლებს თავშესაფარში წასვლისკენ მოუწოდებდა.

"საჰაერო იერიშის საფრთხე. იპოვეთ უსაფრთხო ადგილი. მიჰყევით ხელისუფლების ინსტრუქციებს. დაელოდეთ შემდგომ განცხადებებს", — იტყობინება მთავრობის უსაფრთხოების ცენტრი.

გაფრთხილება სასაზღვრო პროვინციების მცხოვრებლებს შეეხებოდა.

ცნობისთვის, მანამდე სოციალურ ქსელში გავრცელებული ცნობების თანახმად, იაგოდინ-დოროჰუსკის სასაზღვრო გამშვებ პუნქტთან ახლოს დრონი ჩამოვარდა. მედიის ცნობით, ეს პოლონეთის საზღვრიდან ორ კილომეტრშია.