შალვა პაპუაშვილი დიპლომატ გია ჯაფარიძის "პალიტრანიუსის" გადაცემა "თავისუფალ სტუდიაში" გაკეთებულ განცხადებას გამოეხმაურა, რომლის მიხედვითაც ქართული ოცნების ქმედებებით აღარ ვართ ევროკავშირის "მენიუში".

პაპუაშვილის შეფასებით, "უსამშობლო მოქალაქეების" მიზანია, რომ საქართველო ამ "მენიუში" აღმოჩნდეს და დასძინა "ვინ როგორ შეგვახრამუნებს, მერე მაგას უნდა დავაკვირდეთ",

"ეს არ არის წამოცდენა, ეს არის გამონათქვამი — თუ არ ზიხარ მაგიდასთან, ე.ი ხარ "მენიუში". რაც გულისხმობს, რომ თუ არ ხარ თანასწორი და არ ხარ გადაწყვეტილების მიმღებთა შორის, ესე იგი შენზე სხვა მიიღებენ გადაწყვეტილებას.

ამ წამოცდენით [ჯაფარიძემ] გაიმეორა ის, რასაც ჩვენ ბოლო პერიოდში ვისმენთ ბრიუსელის ზოგიერთი კომისრის, მაგალითად მარტა კოსის მხრიდან, რომ კანდიდატ ქვეყნებს უყურებენ როგორც მეორეხარისხოვან ხალხს და უკრძალავენ ტრამპის იდეოლოგიურ საყრდენთან ურთიერთობას, მაშინ, როდესაც თავად ურთიერთობენ. ეტყობა, გონიათ, რომ თავად არიან ჩვენი მეურვეები და ჩვენ არ გყოფნის ჩვენი მოწიფულობა იმისთვის, რომ ჩვენ განვსაზღვროთ ვისთან გქონდეს ურთიერთობა.

დღეს ასე უყურებს, სამწუხაროდ, ბრიუსელი, რომ კანდიდატი ქვეყნები არიან მენიუში, რომლებზეც იღებენ გადაწყვეტილებას ისინი, ვინც სხედან მაგიდასთან. უსამშობლო საქართველოს მოქალაქეების მიზანია, რომ როგორმე აღმოვჩნდეთ “მენიუში” და ვინ როგორ შეგვახრამუნებს, მერე მაგას უნდა დავაკვირდეთ," — განაცხადა პაპუაშვილმა.

ცნობისთვის, 17 სექტემებრს გია ჯაფარიძემ ევროკომისიის პრეზიდენტის, ურსულა ფონ დერ ლაიენის ევროპარლამენტში სიტყვით გამოსვლაზე ისაუბრა. ჯაფარიძემ აღნიშნა, საქართველოს ხელისუფლების გადაწყვეტილებაა, რომ ქვეყანა ევროინტეგრაციის გზით აღარ მოძრაობს.

"ქართული ოცნების მხრიდან ძალიან მკაფიოდ და ცხადად არის დაფიქსირებული, რომ ისინი არ აპირებენ ევროპული ინტეგრაციის გზაზე სიარულს, პირიქით, ევროკავშირის ისინი მტრულ გაერთიანებად აღიქვამენ, რაღას არ აბრალებენ მას და ასეთ ვითარებაში ძალიან ბუნებრივია, რომ ევროკომისიის პრეზიდენტი საქართველოს ამ კონტექსტში აღარ ახსენებს. ჩვენ ქართული ოცნების მიზანმიმართული ქმედებებით ძალიან დიდი ხანია, აღარ ვართ ევროკავშირის "მენიუში". მოლოდინი არც უნდა გვქონოდა, რომ საქართველო იქნებოდა ევროკომისიის პრეზიდენტის მოხსენებაში. ეს არ არის ქართული ოცნების ბოსტანი, ეს ევროპის კავშირია, სადაც სიტყვას ფასი აქვს. ზოგადად, დასავლური ცივილიზაცია ასეთია — ის ნდობაზე დგას," — აღნიშნა ჯაფარიძემ.