სომხეთის ყოფილი პრემიერმინისტრის, ჰოვიკ აბრამიანის ძმა, ჰენრიკ აბრამიანი დააკავეს. ინფორმაციას სომხური მედია ავრცელებს.

ანტიკორუფციულმა კომიტეტის მიერ გავრცელებულ ინფორმაციაში წერია, რომ ჰენრიკ აბრამიანის დაკავება თანამდებობრივი უფლებამოსილების ბოროტად გამოყენებას, ასეთ ქმედებაში თანამონაწილეობას, დოკუმენტების გაყალბებასა და ყალბი დოკუმენტის გამოყენებას ეხება.

"სომხეთის რესპუბლიკის ყოფილი პრემიერმინისტრის ძმა, ჰ. ა. დაკავებულია სომხეთის რესპუბლიკის ანტიკორუფციული კომიტეტის მიერ მიმდინარე სისხლის სამართლის საქმის ფარგლებში, რომელიც ეხება თანამდებობრივი უფლებამოსილების ბოროტად გამოყენებას, ასეთ ქმედებაში თანამონაწილეობას, დოკუმენტების გაყალბებასა და ყალბი დოკუმენტის გამოყენებას", — აღნიშნულია ინფორმაციაში.

აღსანიშნავია, რომ ჰენრიკ აბრამიანი 2018 წელსაც დააკავეს, მაშინ იარაღის უკანონო შეძენა/ფლობის ბრალდებით. ცნობისთვის, ის წარსულში არაერთხელ იყო პარლამენტის წევრი.

თავად, ჰოვიკ აბრამიანი კი სომხეთის პრემიერის პოსტს 2014-2016 წლებში პრეზიდენტ სერჟ სარქსიანის დროს იკავებდა.