შინაგან საქმეთა სამინისტროს განცხადებით, გუშინ საბურთალოზე აღმოჩენილი მკვლელობის საქმე გახსნილია. სათავსოში ნაპოვნი გვამი მამაკაცს ეკუთვნოდა და ჩანთაში იყო მოთავსებული.

შსს-ს ცნობით, დაკავებულია 1987 წელს დაბადებული ო.ა. განზრახ მკვლელობის ბრალდებით და 1963 წელს დაბადებული დ.წ. განსაკუთრებით მძიმე დანაშაულის შეუტყობინებლობის ბრალდებით.

გამოძიების ინფორმაციით, მკვლელობა ოქტომბრის მიწურულს მოხდა. ალკოჰოლის ზემოქმედების ქვეშ მყოფმა ბრალდებულმა თბილისში, ვაკე-საბურთალოს რაიონში, თავის საცხოვრებელ სახლში, ურთიერთშელაპარაკებისას, ნაცნობს - 1976 წელს დაბადებულ გ.მ.-ს ბლაგვი საგნით თავის არეში მრავლობითი დაზიანება მიაყენა, რის შედეგადაც იგი რამდენიმე საათის შემდეგ, შემთხვევის ადგილზე გარდაიცვალა. დანაშაულის დაფარვის მიზნით, ო.ა.-მ ცხედარი თავისი საცხოვრებელი სახლის გვერდით მდებარე სათავსოში დამალა.

შინაგან საქმეთა სამინისტროს ინფორმაციით, ორივე დაკავებული ჩადენილ დანაშაულს აღიარებს.

გამოძიება მიმდინარეობს ჯანმრთელობის განზრახ მძიმე დაზიანების ფაქტზე, რამაც სიცოცხლის მოსპობა გამოიწვია და განსაკუთრებით მძიმე დანაშაულის შეუტყობინებლობის ფაქტზე (საქართველოს სსკ-ს 117-ე მუხლის მე-2 ნაწილით და 376-ე მუხლით).