მეცნიერთა ჯგუფმა წარმატებით შექმნა და თაგვის სხეულში გადანერგა ნაწლავის ხელოვნური ქსოვილი. მკვლევარებმა ჩვეულებრივი კანის უჯრედები და ლეიკოციტები პოლიპოტენციალურ ღეროვან უჯრედებად აქციეს, რომლებსაც ნებისმიერი სახის უჯრედებად ტრანსფორმირება შეუძლიათ. შემდეგ, შესაბამისი მკვებავი ნივთიერებების მიწოდებით აღნიშნული ღეროვანი უჯრედები მარტივ ნაწლავურ ქსოვილად გარდაქმნეს. ისინი ამაზე არ შეჩერდნენ და ქსოვილში შექმნეს ნერვები, რომელთა დახმარებითაც ქსოვილს პულსაციის და შესაბამისად საკვების გადაადგილების უნარი აქვს.

"ეს არის ერთ-ერთი ყველაზე კომპლექსური ქსოვილი, რომელიც აქამდე შექმნილა. მას აქვს შიდა ფენა, რომელიც საკვებს შეიწოვს, აქვს გადამამუშავებელი ნივთიერების გამოყოფის უნარი, ფუნქციური კუნთები, რომელთა დახმარებითაც საკვები ნაწლავურ სისტემაში გადაადგილდება და ნერვები, რომლებიც კუნთების პულსაციას უზრუნველყოფს", - ამბობს ჯიმ უელსი, ცინცინატის ბავშვთა საავადმყოფოს ექიმი და კვლევითი ჯგუფის წევრი.

მეცნიერებმა შესამოწმებლად ქსოვილი თაგვებს გადაუნერგეს. უჯრედები არამხოლოდ გადარჩნენ, არამედ ცხოველის სხეულთან ჩვეულებრივად ადაპტირდნენ. თუ ქსოვილი ასეთივე წარმატებით გადაინერგება ადამიანების სხეულში, მაშინ ექიმები უამრავი პაციენტის დახმარებას შეძლებენ.

ამჟამად ამ მეთოდით შექმნილი 2-სანტიმეტრიანი მილების შემოწმება მიმდინარეობს. მეცნიერებს სურთ, რომ ქსოვილის სიგრძე 10 სანტიმეტრამდე გაზარდონ, რითაც მოკლე ნაწლავის სინდრომის მქონე ჩვილებს დაეხმარებიან. მათი აზრით, ეს სასიამოვნო სიახლე იქნება იმ პაციენტებისთვისაც, რომელთაც ნაწლავების ანთება და კრონის დაავადება აწუხებთ.