ლეიბორისტული პარტიის ლიდერის, შალვა ნათელაშვილის თქმით, ოპოზიცია ერთსულოვნად შეთანხმდა, რომ საკონსტიტუციო ცვლილებებს პატიმრების გათავისუფლების გარეშე ხმას არ მისცემენ და ბოიკოტს არ მოხსნიან. ამის შესახებ მან ლეიბორისტული პარტიის ოფისში ოპოზიციის შეხვედრის დასრულების შემდეგ განაცხადა.

მისი თქმით, ოპოზიცია კომპრომისზე წასვლასა და უკან დახევას არ აპირებს.

"ისტორიული დღე გახლდათ, კვლავ გაგრძელდა საერთო სახალხო წინააღმდეგობის პოლიტიკური ფრონტი არსებული რეჟიმის წინააღმდეგ და პოლიტიკურმა პარტიებმა, ოპოზიციურმა, საპარლამენტომ, არასაპარლამენტომ, ერთსულვნად დაადასტურეს ნება, რომ არავითარი კომპრომისი, არავითარი უკან დახევა არ იქნება იმ მთავარ საკითხებთან დაკავშირებით რაც შეეხება პოლიტიკური ტერორის შედეგთა გადალახვას, პოლიტიკური პატიმრების გათავისუფლებას. სანამ ისინი არ იქნებიან თავისუფლები, არავითარი ბოიკოტის მოხსნა, არავითარი კომპრომისები ხელისუფლებასთან და საკონსტიტუციო ცვლილებზე ხმის მიცემა არ იქნება. ეს გამორიცხონ", — განაცხადა ნათელაშვილმა.

ნათელაშვილის თქმით, ასევე, ოპოზიციის საერთო მოთხოვნაა საგანგებო რეჟიმისა და კომენდანტის საათის გაუქმება.

"ამის გარდა, ოპოზიციურმა პარტიებმა ერთსულოვნად საგანგებო რეჟიმისა და კომენდანტის საათის გაუქმება ეს არის აბსოლუტურად ყურით მოთრეული, ივანიშვილის რეჟიმის გამოგონილი ინსტიტუტეტები, არა იმისთვის, რომ ვირუსს და ეპიდემიას ებრძოლონ, არამედ იმისათვის, რომ გააჩერონ პოლიტიკური, ეკონომიკური და სხვა აქტიური პროცესები ქვეყანაში", — განაცხადა ნათელაშვილმა.

8 მარტის შეთანხმება: ოპოზიცია VS მთავრობა

ბოლო დღეებში ოპოზიციასა და მთავრობას შორის მიღწეული საარჩევნო შეთანხმება ისევ განხილვის საგანი გახდა. ოპოზიციაში აცხადებენ, რომ შეთანხმებიდან ორი თვის შემდეგ მმართველი გუნდი პირობებს არ ასრულებს, რადგან პოლიტიკოსები ისევ პატიმრობაში არიან.

ოპოზიციის საპასუხოდ, პარლამენტის თავმჯდომარე აცხადებს, რომ მმართველ გუნდს პატიმრების გათავისუფლების პირობა არავითარი ფორმით, არავის წინაშე არ დაუდია. თალაკვაძის მტკიცებით, ამას მკაფიოდ ადასტურებს ყველა ფაქტი და დოკუმენტი, მათ შორის თავად შეთანხმების ტექსტი. ქართული ოცნების წარმომადგენლები საუბრობენ იმაზეც, რომ ოპოზიციის მოთხოვნა სასამართლოსთვის დავალების მიცემას გულისხმობს, რასაც არ გააკეთებენ.

დისკუსიას გამოეხმაურნენ საელჩოებიც. მოლაპარაკებებში ჩართული დიპლომატების ერთობლივ განცხადებაში მითითებულია, რომ შეთანხმება შედგება ორი ნაწილისგან: ერთი ფოკუსირებულია საარჩევნო სისტემაზე, მეორე კი ყურადღებას ამახვილებს იმ საკითხების გადაჭრაზე, "რაც სასამართლო სისტემაში პოლიტიკურ ჩარევას ჰგავს". საელჩოებმა მოუწოდეს ყველა მხარეს, სრულად დაიცვან შეთანხმების ორივე ნაწილი, რათა ის წარმატებით განხორციელდეს.

8 მარტს, ხანგრძლივი განხილვების შემდეგ, ოპოზიციამ და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.