თავდაცვის ყოფილი მინისტრი თინა ხიდაშელი ამბობს, რომ მიხეილ სააკაშვილის დანიშვნით უკრაინის პრეზიდენტ ვოლოდიმირ ზელენსკის იგივე ელის, რაც მის წინამორბედ პეტრო პოროშენკოს. ამის შესახებ მან მთავარის ეთერში ისაუბრა.

"მე ვუსამძიმრებ უკრაინას, რომ მორიგ ჯერზე მოუწევს სპექტაკლებისა და სახურავზე მორბენალი სააკაშვილის ყურება. ამაში ისე ვარ დარწმუნებული, როგორ თქვენ გიყურებთ", — აღნიშნა ხიდაშელმა.

მისივე თქმით, რეალური პრობლემა არა სააკაშვილის დანიშვნაში, არამედ ისაა, რომ საქართველოს ხელისუფლება უავტორიტეტოა:

"კაცი არ არის დედამიწაზე, რომელიც აიღებდა ტელეფონს, დაურეკავდა ზელენსკის და ეტყოდა, რომ ეგ კაცი საქართველოში ძებნილი, გასამართლებულია და თქვენი სტრატეგიული პარტნიორის ინტერესიდან გამომდინარე ამ გადაწყვეტილებას ნუ მიიღებთ. ეს არის ჩემი ქვეყნის ტრაგედია [...] არც ერთი გულშემატკივარი და მეგობარი არ ჰყავს გარეთ, რომ შესაბამისი პოლიტიკური გავლენა მოეხდინა უკრაინაზე. ის უკრაინის მოქალაქეა და ზელენსკი იმ გადაწყვეტილება მიიღებს, რა გადაწყვეტილებასაც უნდა. ჩვენ არც ერთ შემთხვევაში და არც ერთ ჯერზე არაფერი გავაკეთეთ იმისთვის, რომ სასამართლოს განაჩენი აღსრულებულიყო".

აპრილის ბოლოს უკრაინის პრეზიდენტმა, ვოლოდიმირ ზელენსკიმ სააკაშვილს რეფორმების საკითხებში ვიცე-პრემიერის პოსტი შესთავაზა. ეს საკითხი ქართული ოცნებისთვის უკრაინასთან დიპლომატიური ურთიერთობის გადახედვის საბაბი გახდა. მთავრობისა და პარლამენტში მმართველი გუნდის ლიდერებმა უკრაინელ კოლეგებს უთხრეს, რომ ეს მათ შორის ნდობას შეარყევდა და კატეგორიულად მიუღებელი იყო. ერთი კვირის შემდეგ კი რადაში ხალხის მსახურის ფრაქციის ლიდერმა, დავიდ არახამიამ განაცხადა, რომ სააკაშვილისთვის მუშაობის ახალი ფორმატი იპოვეს.

რეფორმების ეროვნული საბჭო 2014 წელს მაშინდელი პრეზიდენტის, პეტრო პოროშენკოს ბრძანებით შეიქმნა. საბჭოს წევრებს პერსონალურად უკრაინის პრეზიდენტი ნიშნავს. დოიჩე ველეს ინფორმაციით, 2014-2018 წლებში საბჭომ სულ 28 სხდომა ჩაატარა. ბოლო სხდომა კი 2018 წლის მარტში გაიმართა.

სააკაშვილის დანიშვნის გამო საგარეო საქმეთა სამინისტრომ უკრაინაში საქართველოს ელჩი კონსულტაციებისთვის უკვე გამოიწვია.

პრემიერმინისტრი, გიორგი გახრია ამბობს, რომ უკრაიდან ელჩის კონსლუტაციებისთვის გამოწვევა იმას არ ნიშნავს, რომ ორ ქვეყანას შორის დიპლომატიური ურთიერთობები და სტრატეგიული პარტნიორობა კითხვის ნიშნის ქვეშ დადგება. მისი თქმით, ელჩის გამოწვევის მიზანი მასთან კონსულტაციების გავლაა იმასთან დაკავშირებით, თუ როგორ დაიცვან ქვეყნებს შორის ურთიერთობები ავანტიურისტი პოლიტიკოსებისგან.