საქართველოს მართლმადიდებელი ეკლესიის კათალიკოს-პატრიარქი, ილია მეორე, 19 ნოემბერს, მოსკოვში რუსეთის მართლმადიდებელი ეკლესიის პატრიარქ კირილს შეხვდა.

რუსეთის საპატრიარქოს მიერ გავრცელებულ ოფიციალურ ინფორმაციაში წერია, რომ პატრიარქების შეხვედრისას ხაზი გაუსვეს ორი ქვეყნის მართლმადიდებელ ეკლესიებს შორის პოზიტიური ურთიერთობების გამყარებას.

ოფიციალური განცხადების მიხედვით, ილია მეორემ რუსეთის პატრიარქს 70 წლის იუბილე მიულოცა, ასევე უსურვა კეთილდღეობა და მშვიდობა მის ეკლესიასა და სამშობლოში. ილია მეორემ ხაზი გაუსვა რუსეთისა და საქართველოს ეკლესიების ურთიერთობის მნიშვნელობასაც:

"ურთიერთობები რუსეთისა და საქართველოს მართლმადიდებელ ეკლესიებს შორის მნიშვნელოვანია როგორც ჩვენი ქვეყნისათვის, ისე ჩვენი ხალხისთვის. ჩვენი ეკლესიების მაგალითს აძლევენ პოლიტიკოსებს, თუ როგორი უნდა იყოს ურთიერთობა ორ ქვეყანას შორის. უნდა ვთქვა, რომ საქართველოში, ბოლო წლების განმავლობაში, რუსეთიდან იმდენი ტურისტი არასდროს არ ყოფილა, რამდენიც ახლა. ჩვენ ამით ბედნიერები ვართ. ურთიერთობები ჩვენს ქვეყნებს შორის, სასურველია იყოს უკეთესი, ვიდრე დღეს და ჩვენ უნდა გავაკეთოთ ყველაფერი, რაც შესაძლებელია, რათა გავაუმჯობესოთ ურთიერთობები ორი ქვეყნის პოლიტიკურ ლიდერებს შორის. ვფიქრობ, ეს გამოგვივა. ჩვენ ვჭირდებით ერთმანეთს და ჩვენ უნდა დავეხმაროთ ერთმანეთს".

როგორც რუსეთის მართლმადიდებელი ეკლესიის საპატრიარქო წერს, შეხვედრამ თბილ და მეგობრულ გარემოში ჩაიარა. სტუმარმა და მასპინძელმა ერთმანეთში საჩუქრებიც გაცვალეს.

როგორც პატრიარქმა კირილმა თქვა, რუსეთ-საქართველოს ეკლესიებს შორის მეგობრული ურთიერთობაა და რუსეთს ხშირად სტუმრობენ ქართველი მართლმადიდებელი სასულიერო პირები, ისევე როგორც საქართველოს – რუსი მღვდლები და მონაზვნები.

ილია მეორე რუსეთში, პატრიარქ კირილის 70 წლის იუბილესთან დაკავშირებით 18 ნოემბერს გაემგზავრა. ის საქართველოში 25 ნოემბერს დაბრუნდება.

საქართველო–რუსეთს შორის დიპლომატიური ურთიერთობები 2008 წლის აგვისტოს ომის შემდეგ შეწყვეტილია. რუსეთმა საქართველოში შემოჭრის შემდეგ, 2008 წელსვე აღიარა აფხაზეთისა და ცხინვალის რეგიონის დამოუკიდებლობა. საქართველოს კანონმდებლობის მიხედვით, აღნიშნული მხარეები ოფიციალურად ითვლება რუსეთის ფედერაციის მიერ ოკუპირებულად.