ჯანდაცვის მსოფლიო ორგანიზაციამ 29 აპრილს კორონავირუსთან დაკავშირებით მორიგი პრესკონფერენცია გამართა. სხვა კითხვებთან ერთად, ჟურნალისტები შვედეთის მაგალითითაც დაინტერესდნენ.

ერთ-ერთი მედიის წარმომადგენელმა WHO-ს გადაუდებელი ოპერაციების აღმასრულებელ დირექტორს, მაიკ რაიანს ჰკითხა, აღმოჩნდებოდა თუ არა ეს ქვეყანა თავისი განსხვავებული მიდგომის გამო, სხვა ქვეყნებთან შედარებით, მეტად მომზადებული კორონავირუსის მომდევნო ტალღებისთვის, ანუ ექნებოდა თუ არა შვედეთის მოსახლეობას კოლექტიური იმუნიტეტი.

რაიანის თქმით, იმას, თუ რამდენად წარმატებული გამოდგა შვედეთის განსხვავებული მიდგომა, მომავალში გავიგებთ. თუმცა, მან აქვე დასძინა, რომ თუ ქვეყნები შეზღუდვებს შეამცირებენ, შვედეთისგან, როგორც ამ კუთხით გამოცდილი ქვეყნისგან, ბევრი რამის სწავლა მოუწევთ.

WHO-ს გადაუდებელი ოპერაციების აღმასრულებელმა დირექტორმა ასევე განაცხადა, რომ გავრცელებული მოსაზრება შვედეთის უმოქმედობის შესახებ არასწორია. მისი თქმით, შვედეთმა ძლიერი ჯანდაცვის პოლიტიკა გაატარა, რომელიც დიდწილად ქვეყნის სამედიცინო სისტემის უნარიანობის გაზრდასა და ტესტირებას ეყრდნობოდა. რაიანის განმარტებით, მთავრობა დაეყრდნო და ენდო საკუთარ მოსახლეობას, რომ ისინი იზოლაციისა და ფიზიკური დისტანცირების წესებს შეგნებულად, საკუთარი სურვილით დაიცავდნენ.

მან შემდეგი წინადადება თქვა:

"მე ვფიქრობ, რომ ახალი დღის წესრიგის მიღწევისას, შვედეთი, მრავალი თვალსაზრისით, წარმოადგენს სამომავლო მოდელს, თუ ჩვენ გვინდა დავუბრუნდეთ ისეთ საზოგადოებას, სადაც არ გვაქვს ფიზიკური შეზღუდვები. ამისთვის საზოგადოებამ ფიზიკური და სოციალური ურთიერთობები ვირუსის გათვალისწინებით უნდა შეცვალოს, მეტნაკლებად ან საკმაოდ ხანგრძლივი დროით".

განცხადების შემდეგ უცხოურ პრესაში გავრცელდა სტატიები სათაურებით "შვედეთი, რომელმაც მასობრივი აკრძალვები აირიდა, მსოფლიოსთვის მოდელი უნდა იყოს - ჯანდაცვის მსოფლიო ორგანიზაცია", "ჯანდაცვის მსოფლიო ორგანიზაცია შვედეთს, რომელმაც აკრძალვები არ შემოიღო, აქებს და მომავლის მოდელად ასახელებს".

სტატია გამოქვეყნდა On.ge-ზეც, შემდეგი სათაურით: "შვედეთის კორონავირუსთან ბრძოლის სტრატეგია მსოფლიოსთვის მოდელი უნდა იყოს — ჯანდაცვის მსოფლიო ორგანიზაცია". მას შემდეგ, რაც პრესკონფერენციის შესახებ მეტი დეტალი გახდა ცნობილი, ჩასწორდა On.ge-ზე გამოქვეყნებული სტატიის ტექსტი, ასევე, სათაური.

შეიქმნა არასწორი ინტერპრეტაცია, თითქოს ჯანდაცვის მსოფლიო ორგანიზაცია შვედეთს კორონავირუსთან ბრძოლის წარმატებულ მოდელად ასახელებდა და მოუწოდებდა მთელ მსოფლიოს, მისთვის მიებაძათ.

რეალურად, მაიკ რაიანმა საკუთარ პასუხში თქვა, რომ ჯერ უცნობია, რამდენად წარმატებულად შეიძლება შევაფასოთ შვედეთის გადაწყვეტილებები. ის ამბობს, რომ ქვეყანა მაქსიმალურად ცდილობდა კორონავირუსთან ბრძოლას, ოღონდ შეზღუდვების გამოყენების გარეშე. შესაბამისად, როდესაც საუბარია აკრძალვების შემცირებაზე, შვედეთი არის ის ქვეყანა, რომელსაც ამ რეჟიმში ფუნქციონირების გამოცდილება აქვს.

ამ საკითხს განხილვა მოჰყვა საერთაშორისო მედიაშიც. დღეს The Washington Post-მა გამოაქვეყნა სტატია სათაურით "არა, შვედეთი კორონავირუსთან გამკლავების სასწაულებრივ მოდელს არ წარმოადგენს".

"ახლა, როდესაც მდგომარეობა იცვლება, ინფექციის გავრცელება შედარებით ნელდება და მკაცრი შეზღუდვები იხსნება, ჯანდაცვის მსოფლიო ორგანიზაცია შვედეთის მიდგომას აჟღერებს. მაიკ რაიანი იწონებს, თუ როგორ ენდობა [შვედეთის მთავრობა] მოქალაქეებს თვითრეგულირების განხორციელებაში", — ნათქვამია The Washington Post-ის სტატიაში.