იურიდიულ საკითხთა კომიტეტის თავმჯდომარის, ანრი ოხანაშვილის თქმით, არანაირი საფრთხე და კითხვის ნიშნები არ არსებობს საარჩევნო რეფორმასთან მიმართებით. დეპუტატმა ჟურნალისტებთან საუბრისას თქვა, რომ განხილვები საგანგებო მდგომარეობის დასრულების შემდეგ დაიწყება:

"როგორც კი გაუქმდება საგანგებო მდგომარეობა, გავმართავთ საყოველთაო სახალხო განხილვას და დავიწყებთ ამ ცვლილებების განხორციელებას. ეს მოსწრებადია. არანაირი საფრთხე არანაირი კითხვის ნიშნები არ არსებობს არჩევნებთან მიმართებით".

საკონსტიტუციო ცვლილებების მხარდაჭერას არ აპირებს ოპოზიცია. ისინი აცხადებენ, რომ ხელისუფლებამ არ შეასრულა 8 მარტის შეთანხმების მეორე ნაწილი, რაც მათი თქმით, პოლიტპატიმრების გათავისუფლებას ეხებოდა.

ოპოზიციურმა პარტიებმა დღეს, 23 აპრილს საერთაშორისო საზოგადოებას ღია წერილი გაუგზავნეს, სადაც ითხოვენ, პარტნიორებმა შეახსენონ საქართველოს მთავრობას შეთანხმების სრულყოფილად შესრულების მნიშვნელობა.