როცა ვინმეს მეგობარს ვუწოდებთ, როგორც წესი, არ ვფიქრობთ იმაზე, ეს სტატუსი ორმხრივია თუ არა. მე თუ ის მომწონს და მასაც მოვწონვარ, ესე იგი, ჩემი მეგობარია, არა? სამწუხაროდ, არა.

ბოლოდროინდელი კვლევის თანახმად, მეგობრობად ჩათვლილი ურთიერთობების 50% მეგობრობა არაა.

MIT-ის (მასაჩუსეტსის ტექნოლოგიური უნივერსიტეტის) მკვლევარებმა 23-დან 38 წლამდე 84 სუბიექტი გამოკითხეს, რომლებიც ერთად ესწრებოდნენ ბიზნესის მართვის კურსს. კვლევის მონაწილეებს სთხოვეს შეეფასებინათ თითოეულ თანაკურსელთან ურთიერთობა 0-დან 5-მდე შკალაზე, სადაც 0 ნიშნავდა უცნობს, 3 - მეგობარს, 5 - ძალიან კარგ მეგობარს.

94% დარწმუნებული იყო, რომ სათანადოდ აღწერა იმ მომენტისთვის ურთიერთობის სტატუსი, თუმცა მათგან მხოლოდ 53%-მა გამოიცნო რეალური შედეგი.

უნდა აღვნიშნოთ, რომ კვლევა მეტისმეტად მცირეა იმისთვის, რომ უტყუარად ჩაითვალოს, თუმცა ამ საკითხზე წარსულშიც ჩატარებულა გამოკითხვები. წინა შემთხვევებშიც მონაწილეების მხოლოდ 34%-53% აღმოჩნდა მართალი.

სოციალური ფსიქოლოგიის მკვლევარი ალექს პენტლანდი აღნიშნავს, რომ სხვა ადამიანების წაკითხვას იმიტომ ვერ ვახერხებთ, რომ გვინდა, მართლები აღმოვჩნდეთ. გვიჭირს იმის დაშვება, რომ ვინც მოგვწონს, შეიძლება ჩვენს გრძნობას არ იზიარებდეს. ამიტომაც ვასკვნით, რომ სიმპატია ორმხრივია.

"ჰკითხეთ ადამიანებს, რა არის მეგობრობა და პასუხად პაუზას მიიღებთ", - აღნიშნავს მეცნიერი.

მეგობრობის ცნების განსაზღვრა სულაც არაა ადვილი თანამედროვე სამყაროში, სადაც მეგობრების ყოლა აუცილებლობად ითვლება.

ჩვენ ხშირად ვექცევით მეგობრებს, როგორც ინვესტიციას, რაც მეგობრობის მთელ იდეას ეჭვქვეშ აყენებს, - ამბობს რონალდ შარპი, ლიტერატურის ლექტორი, რომელსაც მეგობრობის თემაზე საკუთარი კურსი აქვს, - არ აქვს მნიშვნელობა, რისი გაკეთება შეუძლია ერთ მეგობარს მეორისთვის, მნიშვნელოვანია, ვინ ხდება ეს ორი ადამიანი ერთმანეთის თანდასწრებით.

ამ ამბავს შეგიძლია პოზიტიური კუთხითაც შევხედოთ. თუ, მაგალითად, თვლით, რომ 10 მეგობარი გყავთ, მათგან 5 მართლაც იზიარებს თქვენს კეთილგანწყობას, რაც იმას ნიშნავს, რომ ყველაფერი ნორმალურადაა.

საშუალოდ, ერთ ადამიანს 150 სოციალური კონტაქტის დამყარება შეუძლია დროის ერთ მონაკვეთში, ახლო მეგობრების რაოდენობა კი მაქსიმუმ ხუთს აღწევს. არსებობენ ადამიანები, რომლებიც ამბობენ, რომ მეტი მეგობარი ჰყავთ, მაგრამ ეს ურთიერთობები, როგორც წესი, ზედაპირულია.

რომ შევაჯამოთ, ადამიანები, რომლებსაც ბევრი მეგობარი ჰყავთ, არც მაინცდამაინც გავლენიანი არიან და არც უკეთესი ცხოვრებით ცხოვრობენ იმ ადამიანებთან შედარებით, რომლებსაც ცოტა მეგობარი ჰყავთ. ალექს პენტლანდს თუ დავუჯერებთ, თუ თქვენი იდეის ფართოდ გავრცელება გსურთ, უნდა მოძებნოთ არა ის პირი, ვისაც ბევრი მიმდევარი ჰყავს, არამედ ადამიანთა წრე, რომელთაც ბევრი საერთო მეგობარი ჰყავთ. მათი ურთიერთობა ბევრად ნამდვილი და დამაჯერებელი იქნება, ვიდრე ის სიტუაცია, რომელსაც სელებრითების სოციალურ არხებზე ვხედავთ.