დეკანოზი ალექსანდრე გალდავა აცხადებს, რომ მის ეკლესიაში სააღდგომო ლიტურგია მრევლის გარეშე ჩატარდება, რადგან ტაძარი და ეზო პატარაა და ბზობაზე მრევლის სოციალური დისტანცია ვერ უზრუნველყვეს. მისი თქმით, შეაშფოთა იმ ფაქტმა, რომ სიტუაციას ვერ მართავდა და მრევლს თხოვა აღდგომას არ შეიკრიბონ.

"მე ბზობას ვთხოვე, ცოტანი მოსულიყო ხალხი, მაგრამ მაინც მოვიდნენ იმაზე მეტი, ვიდრე დისტანციას დაიცავდა და რეკომენდაციებში იყო გათვალისწინებული. ამან ძალიან დამაფიქრა, შემაშფოთა და დავინახე, რომ ვერ ვმართავ სიტუაციას. ეს იქნებოდა ჩემგან ტყუილი, რომ მოვუფრთხილდი ჩემს მრევლს. ამიტომ ვთხოვე მრევლს, რომ აღდგომა ჩავატაროთ ერთმანეთის გარეშე", — განაცხადა მან TV პირველის ეთერში.

დეკანოზის თქმით, მრევლი სიტუაციას გაგებით მოეკიდა და არსებულ რეალობას ითვალისწინებენ.

"მათ იციან, მეც ვიცი, ყველას ძალიან გვიხარია აღდგომა. ეს არის უბედნიერესი დღე. ეს არის გამარჯვება სიცოცხლის სიკვდილზე და მსახურება ძალიან ამაღელვებელი და ამაღლებულია, მაგრამ რა ვქნათ, რეალობა არის ასეთი და ჩემი მრევლიც გაგებით მოეკიდა ამას", — განაცხადა მან.

კორონავირუსის შიდა გავრცელების ფონზე ისევ პრობლემურად რჩება საქართველოს საპატრიარქოს პოზიცია სააღდგომო ლიტურგიის საკითხზე. მაშინ, როცა ჯანდაცვის სფეროს წარმომადგენლები მუდმივად იმას ამბობენ, რომ ნებისმიერი ხალხმრავალი შეკრება საფრთხისშემცველია, ეკლესიებში წირვებზე ათეულობით ადამიანი მიდის და სააღდგომო ლიტურგიაც ღამის საათებში, კომენდანტის საათის დროს არის დაგეგმილი.

15 აპრილს საქართველოს მთავრობამ და საპატრიარქომ გადაწყვიტა, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრება. მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ეკლესია ასაკობრივი ჯგუფის, რისკჯგუფის, დაავდების ან რაიმე სიმპტომის მქონე ადამიანებს, ასევე, ბავშვებს აძლევს რეკომენდაციას, ჯანდაცვის სამინისტროსა და დაავადებათა კონტროლის ეროვნული ცენტრის ყველა რეკომენდაცია გაითვალისწინონ. ჯაღმაიძემ, ასევე, თქვა, რომ აღდგომის დღეებში სასაფლაოზე არ წასვლით, არაფერი დაირღვევა და ეს ეკლესიის წესების ნაწილი არაა.

დაავადებათა კონტროლის ეროვნული ცენტრის დირექტორის მოადგილემ. პაატა იმნაძემ კი თქვა, რომ ინფიცირებულებმა, რომლებმაც არ იციან დაავადების არსებობის შესახებ, ეკლესიებში მივლენ და ავად გახდიან ყველას. მისი თქმით, თუ არ გვინდა საქართველო კუბოების რაოდენობას ვეღარ აუდიოდეს, ყველა სახლში უნდა დარჩეს. მსგავსი მოწოდება გაავრცელა NCDC-ის დირექტორმა, ამირან გამყრელიძემ და ჯანდაცვის მინისტრმა, ეკატერინე ტიკარაძემაც.

ბოლო მონაცემებით, საქართველოში კორონავირუსით ინფიცირების 343 შემთხვევა დაფიქსირდა. გამოჯანმრთელებულია 76 პაციენტი, ხოლო გარდაცვლილია 3 ადამიანი, უცხოეთიდან სამკურნალოდ გადმოყვანილი საქართველოს მოქალაქეები — 3, კარანტინის რეჟიმში 5 000 პირი რჩება, სტაციონარში მეთვალყურეობის ქვეშ კი 494 პაციენტი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: