ჯანდაცვის მინისტრი, ეკატერინე ტიკარაძე ამბობს, რომ თუ მოქალაქეები საკუთარი ბედის გამოცდას დაიწყებენ, შესაძლოა საქართველო "მეორე იტალია" გახდეს.

მისი თქმით, ამის საფუძველს ექიმების ის მცირე რაოდენობა იძლევა, რაც საქართველოს გააჩნია.

"სამინისტროსგან პირველი განგაშის სიგნალი იყო ის, რომ ჩვენ დავასახელეთ ექიმების ის რიცხოვნება, რაც გაგვაჩნია. აქედან გამომდინარე ძალიან მნიშვნელოვანია, რომ მოქალაქეებმა არ დაიწყონ საკუთარი ბედის გამოცდა და არ დააყენონ ჩვენი ექიმები თავიანთი მცირე რესურსიდან გამომდინარე, რიცხოვნობას ვგულისხმობ, იმ რისკი წინაშე, რომ საქართველო გახდეს მეორე იტალია", — განაცხადა ტიკარაძემ.

ტიკარაძე არ არის პირველი, ვინც საქართველოში მოსალოდნელი საფრთხისას იტალიის მაგალითს იშველიებს. მას შემდეგ, რაც 15 აპრილს, საქართველოს მთავრობამ და საპატრიარქომ გადაწყვიტეს, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრება, ჯანდაცვის სფეროს წარმომადგენლების მხრიდან მსგავსი რიტორიკა ისმის.

დაავადებათა კონტროლის ეროვნული ცენტრის დირექტორის მოადგილემ. პაატა იმნაძემ კი თქვა, რომ ინფიცირებულებმა, რომლებმაც არ იციან დაავადების არსებობის შესახებ, ეკლესიებში მივლენ და ავად გახდიან ყველას. მისი თქმით, თუ არ გვინდა საქართველო კუბოების რაოდენობას ვეღარ აუდიოდეს, ყველა სახლში უნდა დარჩეს.

მთავრობისა და საპატრიარქოს ერთობლიბი გადაწყვეტილებით, აღდგომის ღამეს დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება.ანდრია ჯაღმაიძის განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ეკლესია ასაკობრივი ჯგუფის, რისკჯგუფის, დაავდების ან რაიმე სიმპტომის მქონე ადამიანებს, ასევე, ბავშვებს აძლევს რეკომენდაციას, რომ ყველა ჯანდაცვის სამინისტროსა და დაავადებათა კონტროლის ეროვნული ცენტრის ყველა რეკომენდაცია გაითვალისწინონ. ჯაღმაიძემ, ასევე, თქვა, რომ აღდგომის დღეებში სასაფლაოზე არ წასვლით, არაფერი დაირღვევა და ეს ეკლესიის წესების ნაწილი არაა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: