პრემიერ-მინისტრი გიორგი გახარია ამტკიცებს, რომ სახელმწიფოსა და ეკლესიას სრულად აქვთ გათვიცნობიერებული პასუხისმგებლობები. მათ შორის ადამიანის ჯანრმთელობაზე, კანონის დარღვევასა და სახელმწიფო ინსტიტუტების მნიშვნელობაზე. მისი თქმით, ერთად ცდილობენ "ოქროს ბალანსის" პოვნას ისე, როგორც ეს "საუკუნეების განმავლობაში ხდებოდა".

"მინდა დაგარწმუნოთ, რომ სახელმწიფოსაც და ეკლესიასაც სრულად აქვს გათვიცნობიერებული პასუხისმგებლობა, როგორც ადამიანის ჯანმრთელობის ნაწილში, ასევე, სახელმწიფოს ინსტიტუტების მნიშვნელობის ნაწილში და კანონის დარღვევის მნიშვნელობის ნაწილში, ისევე, როგორც ეკლესიის ფუნქციონირების ნაწილში. გამოწვევა გახლავთ სწორედ ის, რომ ვიპოვოთ ის ოქროს ბალანსი, რომელზეც ახლა ერთობლივად ვმუშაობთ. რა თქმა უნდა, იდეალური არაფერი არ არის", — განაცხადა მან.

მაშინ, როცა საპატრიარქო სააღდგომო ლიტურგიის ჩატარებას კომენდანტის საათის დროს გეგმავს, გახარია ამტკიცებს, რომ სახელმწიფოს პოზიციით, კანონის წინაშე ყველა ერთიანია, თუმცა თავადვე ამბობს, რომ სააღდგომოდ ეკლესია არ დაიხურება. მისი თქმით, ამ ბრძოლიდან უნდათ გამოვიდნენ ისე, რომ არ დაანგრიონ არც სახელმწიფო და არც ეკლესია.

კითხვას, როგორია სახელმწიფოს პასუხი იმაზე, რომ ბზობაზე ბევრი ადამიანი შეიკრიბა და ისინი დისტანციას არ იცავდნენ, გახარია პასუხობს, რომ შსს-ს უფრო ეფექტურად უნდა ემოქმედა. მანვე აღნიშნა, რომ დაჯარიმებები იყო, თუმცა არასერიოზული იქნება მისგან იმის თქმა, რომ დაჯარიმდა ყველა ის ადამიანი, ვინც კანონი დაარღვია.

გახარიას თქმით, საგანგებო მდგომარეობა 10 მაისამდე გრძელდება და 15 აპრილის 21:00 სააათიდან კი თბილისში, რუსთავში, ქუთაისსა და ბათუმში 10 დღით შესვლა და გასვლა აიკრძალება.

ბოლო მონაცემებით, საქართველოში კოროანვირუსით ინფიცირების 296 შემთხვევა დადასტურდა. ინფიცირებულებიდან გარდაიცვალა 3 და გამოჯანმრთელდა 69 ადამიანი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: