ერთიან ნაციონალური მოძრაობის ინფორმაციით, StopCov-ის ფონდში ქართული ოცნების თავმჯდომარის, ბიძინა ივანიშვილის ოჯახის მიერ გადარიცხული 100 მილიონი ლარი გათეთრებული ფულია. ოპოზიციური პარტია ქართუ ფონდისგან მოითხოვს, რომ ფულის წარმომავლობა და ტრანზაქციები საჯარო გახადოს.

როგორც პარტიის წევრმა ხატია დეკანოიძემ ბრიფინგზე ისაუბრა, მათი წყარო ყვება, რომ გათეთრებული 100 მილიონი ოფშორიდან გადმოირიცხა და შესაბამისი სქემით გადაირიცხა ფონდში. დეკანოიძის განმარტებით, ბიძინა ივანიშვილსა და უჩა მამაცაშვილს შექმნილი აქვთ "დანაშაულებრივი სქემა", რომელიც საქართველოს რკინიგზასთან და მასთან აფილირებულ გადამზიდავ კომპანიებს ეხება.

"ჩვენი წყარო ამბობს, რომ ერთი გადამზიდავი კომპანია, რომელიც აფილირებულია რკინიგზასთან და ვიცით, რომ რკინიგზა დიდი ხანია მოგებაზე ვეღარ მუშაობს, კომპანიამ ოფშორით გათეთრებული 100 მილიონი გადაურიცხა პირდაპირ ამ ფონდს", — განაცხადა დეკანოიძემ.

მისივე თქმით, მას შემდეგ, რაც ამის შესახებ საჯაროდ ისაუბრა პარტიის წევრმა, მურთაზ ზოდელავამ, მას 15 წლის წინანდელ საქმეზე პროკურატურიდან დაურეკეს:

"რაც კავშირშია და ადასტურებს, რომ იმ თანხასთან დაკავშირებული ეჭვი არის სიმართლე. თუ ფონდი არ გაასაჯაროებს ამ ინფორმაციას, ეს არის პირადაპირი დასტური, რომ მათ იციან ამ თანხის წარმომავლობის შესახებ".

ხატია დეკანოიძემ მიმართა პროკურატურასაც, რომ თანხის წარმომავლობის გასაჯაროების შემდეგ მოკვლევა დაიწყონ.

8 აპრილს StopCov ფონდში ბიძინა ივანიშვილის ოჯახმა 100 მილიონი ლარი გადარიცხა.

"სპეციალურად StopCoV ფონდისთვის 100 მილიონი ლარი ბიძინა ივანიშვილმა ქართუ ფონდში რამდენიმე დღის წინ ჩარიცხა. ბიძინა ივანიშვილის ოჯახის დონაცია კორონავირუსთან ბრძოლის ფონდის ანგარიშზე გუშინ გვიან ღამით აისახა", — წერია პარტიის განცხადებაში.

13 მარტს ფონდმა ქართუმ გაავრცელა განცხადება, რომ კორონავირუსის გავრცელებასთან ბრძოლაში მზადაა, საჭიროებისა და დანაკლისის შემთხვევაში სახელმწიფოს ფინანსურად დაეხმაროს. ფონდის განცხადება მმართველმა პარტიამ, ქართულმა ოცნებამ გაავრცელა:

"ქართუ ფონდი, თავის მხრივ, გამოთქვამს მზადყოფნას საჭიროების, ნებისმიერი შესაძლო ფინანსური თუ სხვა სახის დანაკლისის შემთხვევაში, საკუთარი სახსრებით შეავსოს ეს დანაკლისი და სახელმწიფოს გამოუყოს იმ მოცულობის ფინანსური რესურსი, რაც საჭირო იქნება ვირუსის გავრცელების საფრთხისგან საზოგადოების მაქსიმალურად დასაცავად".

StopCov ფონდი მთავრობის ინიციატივით შეიქმნა და შეგროვებული თანხა კორონავირუსის წინააღმდეგ საბრძოლველად უნდა დაიხარჯოს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: