აშშ-ში კენტუკის შტატის გუბერნატორი ენდი ბეშერი მოსახლეობას აფრთხილებს, რომ აღდგომას არ შეიკრიბონ. გუბერნატორის თქმით, წინააღმდეგ შემთხვევაში, სახლში დარჩენის ბრძანების უგულებელყოფისათვის მოქალაქეებს 14-დღიანი კარანტინის გავლა მოუწევთ.

ბეშერი ამბობს, რომ ისინი აღრიცხავენ ყველა ადამიანს, ვინც მასობრივ ღონისძიებებზე წავა და მათზე ინფორმაციას ჯანდაცვის უწყებებს გადასცემენ. განცხადება ამის შესახებ გუბერნატორმა 10 აპრილს გააკეთა, როცა კათოლიკური ეკლესია წითელი პარასკევს აღნიშნავს.

"ვიმედოვნებ, ყველამ იცის, რომ ასეთ დღეებშიც არ შეგვიძლია შეკრებების მოწყობა. ვერ მივცემთ ადამიანებს უფლებას, რომ ერთ შენობაში შეიკრიბონ, რადგან სწორედ ასე ვრცელდება ინფექცია და ადამიანები კვდებიან", — აღნიშნა გუბერნატორმა.

კენტუკის გუბერნატორის განცხადება გააკრიტიკა რესპუბლიკელმა სენატორმა რენდ პოლმა, რომელიც კორონავირუსისგან გამოჯანმრთელდა. თუმცა დემოკრატი ენდი ბეშერი ამბობს, რომ უსამართლობაა, როცა მოქალაქეთა ნაწილი დაწესებულ შეზღუდვებს არღვევს და კორონავირუსის გავრცელებას რისკავს.

აშშ პირველი ქვეყანაა, სადაც ერთ დღეში კორონავირუსით 2 000-ზე მეტი ადამიანი გარდაიცვალა. ქვეყანაში უკვე ნახევარი მილიონი დადასტურებული შემთხვევაა და 18 693 გარდაცვლილი ადამიანი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: