მარგვეთისა და უბისის ეპისკოპოსი მელქისედეკი ამბობს, რომ სასულიერო პირებს კორონავირუსის ტესტების "ავკარგიანობაზე" სასაუბროდ კომპეტენცია არ აქვთ.

მისი თქმით, ტესტების შეფასება მედიკოსების საქმეა და სასულიერო პირების ვალდებულებაა, რომ დაეხმარნონ და ხელი შევუწყონ მათ, რომ რთული ვითარებიდან მინიმალური დანაკარგით გამოვიდნენ.

ეპისკოპოსისი აზრიღ, რაც უფრო ხშირად ჩატარდება ტესტირება, მით უფრო დაცული იქნებიან ვირუსისის გავრცელებისგან.

"ამით მარტო ჩვენს თავს კი არა, სხვა ადამიანებსაც დავიცავთ და არ გავხდებით ვირუსის უნებლიეთ გავრცელების წყარო. ერთადერთი გამოსავალი ამ დროისთვის არის ტესტირებით საწყის ეტაპზე გამოვლენა ვირუსის და თვით იზოლაცია. ყველამ უნდა გავითავისოთ, რომ ვირუსთან ბრძოლა მხოლოდ ექიმების საქმე კი არა, თითოეული ჩვენგანის ვალდებულებაა", — წერს ეპისკოპოსი ფეისბუქზე.

ჯანდაცვის სამინისტრომ, დაავადებათა კონტროლის ცენტრმა და სამედიცინო სფეროს ექსპერტებმა Covid-19-ის ტესტირების ალგორითმი შეიმუშავეს, რომელიც განსაზღვრავს, ვინ და როგორ დაიტესტება. ალგორითმში მოხვდნენ სასულიერო პირებიც. ამ თემაზე გუშინ პრემიერმა, გიორგი გახარიამ განაცხადა:

"ეს უკავშირდება ყველაფერს და პირველ რიგში, რისკების შეფასებას ეპიდემიოლოგების მხრიდან. საერთოდ, ამ პროტოკოლის შეცვლა დაკავშირებულია რისკების შეფასებასთან და რა თქმა უნდა, ეპიდემიის განვითარებასთან, ახალ ეტაპზე გადასვლასთან ქვეყანაში".

ზუგდიდისა და ცაიშის ეპარქიის მიტროპოლიტი, მეუფე გერასიმე კორონავირუსზე სასულიერო პირების ტესტირებას "არ მიესალმება". მისი აზრით, მიუხედავად ეკლესიებში ხალხმრავლობისა და საერთო კოვზით ზიარებისა, რისკჯგუფად სასულიერო პირები არ უნდა ითვლებოდნენ.

ბოლო მონაცემებით, საქართველოში კორონავირუსით ინფიცირების 234 შემთხვევაა დადასტურებული. აქედან გარდაცვლილია 3 ადამიანი, გამოჯანმრთელებულია 54.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: