დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ცენტრის დირექტორის მოადგილემ, პაატა იმნაძემ განაცხადა, რომ სწრაფი ტესტების უხარისხობაზე აქამდეც საუბრობდა, თუმცა არ მოუსმინეს. მთავარი არხის კითხვაზე, მეტყველებს თუ არა ქვეყანაში შემოსული სწრაფი ტესტების უხარისხობაზე ის ფაქტი, რომ ამ ტესტით ექიმს ვირუსი დაუდგინდა, PCR ტესტით კი არა, იმნაძემ ასე უპასუხა:

"მე რომ ვამბობდი მაგას, თავი შევიკავოთ მეთქი, რატო არ არიო. მერე რომ ვთქვი, ა, ბატონო არი თქო, რატო არიო. რა ვქნა ახლა, ჭრელო პეპელა, ნურც გაფრინდები, ნურც მოფრინდებიო. ვამბობ და ვიძახი, ველოდებით ხარისხიან სწრაფ ტესტებს, დღეს ვაკეთებ იმითი, რაც არის ოქროს სტანდარტი. იმას ვაკეთებთ სწრაფად, რასაც სხვა ქვეყნებში დღეები სჭირდება და ახლა ჭრელი პეპელა არა ვარ რა", — განაცხადა იმნაძემ.

როგორც ცნობილია, სამედიცინო რეგულირების სააგენტომ 4 კომპანიას სწრაფი ტესტების შემოტანის უფლება მისცა. მათი ნაწილი ტესტებს კომერციულად ატარებს.

რაც შეეხება სახელმწიფოს, ჯანდაცვის მინისტრის მოადგილის, თამარ გაბუნიას განცადებით, ამ ეტაპზე ქვეყანას 4 000 ანტისხეულზე და 2 000 ანტიგენზე დამყარებული ტესტი აქვს.

სწრაფი ტესტების ქვეყანაში შემოტანის საკითხი, როგორც სახელმწიფოს, ისე კერძო კომპანიების მხრიდან პოლიტიკური დავის საგანი გახდა. ოპოზიცია ამტკიცებდა, რომ ხელისუფლება ტესტების შემოტანას აგვიანებდა, ხელისუფლება კი ამას "ხარისხის შემოწმებით" ამართლებდა.

რამდენიმე დღის წინ ცნობილი გახდა, რომ სახელმწიფოს ხელშეკრულება ჰქონდა გაფორმებული ჩინურ კომპანიასთან, რომლის ტესტები ხარვეზის გამო ევროპულმა სახელმწიფოებმა დაიწუნეს. მინისტრის თქმით, ეს ტესტები ქვეყანაში არ შემოსულა და ხელშეკრულება გაუქმდა.

ბოლო მონაცემებით, საქართველოში კორონავირუსით ინფიცირების 148 შემთხვევაა დაფიქსირებული, აქედან 27 ადამიანი უკვე გამოჯანმრთელდა. კარანტინის რეჟიმში რჩება 5392 პირი, სტაციონარში მეთვალყურეობის ქვეშ — 319.

ჯანდაცვის მინისტრის თქმით, საქართველოს მასშტაბით უკვე 20 კლინიკა არის სრულიად მობილიზებული იმისათვის, რომ კორონავირუსით დადასტურებული და ცხელების ნიშნების მქონე პაციენტები მიიღოს.

3 აპრილის მონაცემებით, ბოლო 24 საათის განმავლობაში, მთელი ქვეყნის მასშტაბით, საგანგებო მდგომარეობის რეჟიმის და ე.წ. კომენდანტის საათის შეზღუდვების დარღვევისთვის 491 პირი დააჯარიმეს.

საქართველოში საგანგებო მდგომარეობის პირობები 30 მარტს გამკაცრდა. პრემიერმინისტრმა თქვა, რომ "ფაქტობრივად კარანტინს" აცხადებენ, რომელიც 31 მარტის 8 საათიდან ამოქმედდა და ასევე "ფაქტობრივ კომენდანტის საათს" ითვალისწინებს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: