ამერიკის შეერთებული შტატების პრეზიდენტი ამბობს, რომ კორონავირუსის გავრცელების შეჩერების მიზნით, ნიუ-იორკში კარანტინის გამოცხადებას განიხილავს.

დონალდ ტრამპის თქმით, შტატში ვირუსის 52 ათასი დადასტურებული შემთხვევაა და გარდაცვლილია 728 ადამიანი.

თუმცა, შტატის გუბერნატორი ენდრიუ კუომო ამბობს, რომ მსგავსი ზომების მიღებას პრეზიდენტთან არ განუხილავს.

"მასთან მსგავსი საუბარი არ გვქონია. არც ვიცი ეს რას ნიშნავს" - აღნიშნა მან.

ამერიკაში კორონავირუსის ყველაზე მაღალი მაჩვენებნიუ-იორკის შტატშია. ტრამპმა დაამატა, რომ შესაძლოა, კარანტინის ქვეშ მოექცეს ნიუ-ჯერსი და კონექტიკუტის ნაწილიც.

"შეიძლება ამის გაკეთება არ დაგვჭირდეს, მაგრამ შესაძლებელია, რომ გამოვაცხადოთ კარანტინი, მოკლევადიანი, ორი კვირის განმავლობაში", — თქვა მან.

ამერიკის შეერთებული შტატები კორონავირუსით ინფიცირებულთა რაოდენობით მსოფლიოში პირველია — ქვეყანაში კორონავირუსის 119 682 დადასტურებული შემთხვევაა, მათ შორის გარდაცვლილია 1 988 ადამიანი.