დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

ახალქალაქის, კუმურდოსა და კარის მიტროპოლიტი ნიკოლოზი ამბობს, რომ ტაძრებში მრევლი ერთმანეთისგან დისტანციას დაიცავს და "უფრო შორი-შორს" დადგება. ამის შესახებ მეუფე ნიკოლოზმა კორონავირუსის გამო შეკრების შესახებ შემოღებულ შეზღუდვებზე საუბრისას განაცხადა.

მისი თქმით, ადამიანები თავშეყრას უნდა მოერიდონ, მაგრამ რა იგულისხმება თავშეყრაში, უნდა განიმარტოს. როგორც მეუფე ნიკოლოზი ამბობს, ადრე ეკლესიებში სიმჭიდროვე იყო და მრევლი "ერთმანეთსაც ეხებოდა", მაგრამ დღეს "უამრავი ტაძარია" და ეს პრობლემა ნაკლებადაა.

"ჯანმრთელ ადამიანს რომ აღდგომის წირვაზე უთხრა, არავითარ შემთხვევაში ეკლესიაში არ მოხვიდეო, საპირისპირო რეაქციას გამოიწვევს. ვენდოთ ერთმანეთს, მეტი არაფერი, ჩვენ ვენდობით: ჯანდაცვის მუშაკებს, ჩვენს მთავრობას და საზოგადოებაც გვენდოს ჩვენც... დღეს უამრავი ტაძარია, გავიშლებით, უფრო შორი-შორს დავდგებით ერთმანეთისგან. 2 მეტრზე მეტი რეკომენდაციებში მე არ გამიგია. გონიერების ფარგლებში გავაკეთოთ და ახლა, ამ თვალსაზრისით, მებრძოლი არავინ არ არის", — განაცხადა ნიკოლოზმა რუსთავი 2-ის ეთერში.

დღეს, 21 მარტს საგანგებო მდგომარეობაზე საუბრის დროს პრემიერ-მინისტრმა, გიორგი გახარიამ განაცხადა, რომ ათზე მეტი ადამიანის შეკრება იზღუდება.

საგანგებო მდგომარეობის გამოცხადების დროს, გიორგი გახარიამ განაცხადა, რომ ათზე მეტი ადამიანის შეკრება იკრძალებოდა. ჟურნალისტების კითხვაზე ეხებოდა თუ არა ეს ეკლესიაში შეკრებებს გახარიამ უპასუხა:

"შეკრების შეზღუდვა ეხება ყველას და ყველაფერს და ამის მიზანი გახლავთ ჩვენი მოქალაქეების ჯანმრთელობაზე ზრუნვა. საქართველოს მთავრობის ძირითადი ამოცანა გახლავთ ვიზრუნოთ ჩვენი მოქალაქეების ჯანმრთელობაზე მიუხედავად მათი რელიგიური მრწამსისა".

მას შემდეგ, რაც პარლამენტმა პრეზიდენტის მიერ გამოცემული დეკრეტი დაამტკიცა, პარლამენტის თავმჯდომარე არჩილ თალაკვაძემ განაცხადა, რომ დოკუმენტში საუბარია შეკრებისა და მანიფესტაციის შესახებ უფლების შეზღუდვაზე, თუმცა რწმენისა და აღმსარებლობის უფლებასთან დაკავშირებით შეზღუდვები არ არის.

პარლამენტის თავმჯდომარეს რამდენჯერმე დაუსვეს კითხვა, რა ხდებოდა იმ შემთხვევაში, თუ ტაძარში ათზე მეტი ადამიანი შეიკრიბებოდა და გავრცელდებოდა თუ არა მათზე საგანგებო მდგომარეობის შეზღუდვები. არჩილ თალაკვაძე ყოველ ჯერზე პასუხობდა, რომ რწმენისა და აღმსარებლობის უფლების შეზღუდვაზე დეკრეტში საუბარი არაა.

მისივე მოსაზრებით, პრემიერ-მინისტრი გიორგი გახარია ათი ადამიანის შეკრებაზე საუბრისას, მანიფესტაციასა და შეკრებას გულისხმობდა.

საგანგებო მდგომარეობა: რა შეზღუდვები დაწესდება და რა არა

საქართველოს პარლამენტმა საგანგებო მდგომარეობის გამოცხადებას მხარი დაუჭირა. დღეიდან 21 აპრილამდე ქვეყნის მთელ ტერიტორიაზე საგანგებო მდგომარეობაა

პრემიერ-მინისტრის განმარტებით, საგანგებო მდგომარეობისას დაწესდება შემდეგი შეზღუდვები:

• აიკრძალება შეკრება და მანიფესტაცია (პრემიერის განმარტებით, შეიზღუდება ათზე მეტი ადამიანის შეკრება და ეს ეხება ეკლესიასაც);
• სასამართლო სხდომები გაიმართება დისტანციურად;
• შეიზღუდება საერთაშორისო სამგზავრო საჰაერო, სახმელეთო და საზღვაო მიმოსვლა, გარდა სატვირთო გადაზიდვებისა;
• იზოლაციის ან კარანტინის წესების დარღვევისთვის პირი იძულებით იქნება გადაყვანილი შესაბამის დაწესებულებაში და მის მიმართ გამოყენებული იქნება სანქციები;
• საგანგებო მდგომარეობის რეჟიმის დარღვევისთვის, ფიზიკური პირი დაჯარიმდება 3 ათასი ლარის ოდენობით, ხოლო იურიდიული პირი 15 ათასით. განმეორებითი ქმედება გამოიწვევს სისხლის სამართლებრივ პასუხისმგებლობას 3 წლამდე თავისუფლების აღკვეთით;

პრემიერის განმარტებით, საგანგებო მდგომარეობა არ ითვალისწინებს:

• საკომენდატო საათის შემოღებას;
• მედიის მუშაობის შეზღუდვას;
• სატრანსპორტო გადაადგილების შეზღუდვას;
• ინფრასტრუქტურული პროექტების შეჩერებას;

გარდა ამისა, პრემიერის განცხადებით, საგანგებო მდგომარეობისას ზიანი არ მიადგება საკონსტიტუციო ცვლილებების გატარებას, რომელიც 2020 წლის არჩევნების 120/30-ზე მანდატით ჩატარებას გულისხმობს.

საგანგებო მდგომარეობისას მთავრობას ექნება უფლება:

• აუცილებლობის შემთხვევაში, შეზღუდოს საკუთრების უფლება. კერძოდ, საკარანტინო, საიზოლაციო, სამედიცინო მიზნებისთვის გამოიყენოს ფიზიკურ და იურიდიულ პირთა ქონება და მატერიალური საშუალებები;
• კერძო სტრუქტურებს, ორგანიზაციებს შეუზღუდოს ან დაავალოს კონკრეტული საქმიანობის განხორციელება;
• აუცილებლობის შემთხვევაში, მედიკამენტებზე, სამედიცინო მომსახურებასა და პირველადი მოხმარების პროდუქტებზე დაარეგულიროს ფასები;
• დაადგინოს განათლების შესახებ კანონისგან განსხვავებული წესები;
• დაადგინოს საჯარო სერვისების მიწოდების განსხვავებული წესები;
• დაადგინოს ადმინისტრაციული საქმისწარმოების განსხვავებული წესები და ვადები;
• საჭიროების შემთხვევაში, მოახდინოს შესაბამისი სამედიცინო განათლებისა და უფლებამოსილების მქონე პირთა მობილიზება;

საგანგებო მდგომარეობის გამოცხადებამდეც, მთავრობას კორონავირუსის პრევენციისთვის დაწესებული ჰქონდა არაერთი შეზღუდვა, შედეგად ათეულობით ადამიანი სამსახურისა და შემოსავლის წყაროს გარეშე დარჩა. პრემიერის თქმით, ამ საკითხზე მუშაობენ და უახლოეს დღეებში წარადგენენ გეგმას.

აქამდე შემოღებული წესებით კი შემდეგი შეზღუდვებია დაწესებული:

• მუშაობა შეწყვიტა ყველა სავაჭრო ობიექტმა სასურსათო მაღაზიების, სააფთიაქო და საფოსტო ქსელების, ბენზინგასამართი სადგურებისა და ბანკების გარდა;
• აიკრძალა სამარშრუტო ტაქსების გადაადგილება;
• საზღვარი დაკეტილია ყველა უცხო ქვეყნის მოქალაქისთვის;
• საჰაერო მიმოსვლა შეწყდა ყველა კომპანიისთვის საქართველოს ავიახაზების გარდა;
• ყველას, ვინც საქართველოს საზღვარს გადმოკვეთს, კარანტინში გაუშვებენ;
• საჯარო დაწესებულებების ნაწილმა, მათ შორის, შსს-ს მომსახურების სააგენტომ და იუსტიციის სახლმა მომსახურებები შეზღუდა;

გარდა ამისა, როგორც კერძო, ისე საჯარო სექტროს მიცემული აქვს რეკომენდაცია დისტანციურ მუშაობაზე. 70 წელზე ზევით მოხუცებს კი თვითიზოლაცია ურჩიეს.

ბოლო მონაცემებით, საქართველოში კორონავირუსით ინფიცირებულია 49 პირი, გამოჯანმრთელებულია — 1. კარანტინის რეჟიმში რჩება 1 966, სტაციონარში მეთვალყურეობის ქვეშ კი 259 ადამიანი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე:

• აუცილებელი რეკომენდაციები კორონავირუსისგან თავის დასაცავად
• რეკომენდაციები თვითიზოლაციაში მყოფი პირებისთვის
• რეკომენდაციები კარანტინში მყოფებისთვის
• როგორ უნდა გაიკეთოთ, გამოიყენოთ და გადააგდოთ ნიღაბი
• როგორ დავიბანოთ ხელები სწორად კორონავირუსისგან დასაცავად.