ვიდრე მთელი მსოფლიოს ყურადღება ამერიკის საპრეზიდენტო არჩევნებზეა მიპყრობილი, რამდენიმე შტატის მოსახლეობამ პრეზიდენტთან და სენატთან ერთად მარიხუანის ლეგალიზების საკითხზეც მისცა ხმა.

არიზონა, კალიფორნია, მეინი, ნევადა და მასაჩუსეტსი იმ გადაწყვეტილების წინაშე დგანან, რომელმაც აშშ-ს კულტურა და ეკონომიკა შეიძლება მთლიანად შეცვალოს.

რამდენიმე შტატის წინასწარი მონაცემები უკვე ცნობილია.

მასაჩუსეტსი

ლეგალიზაციის კანონის ძალაში შესვლის შემდეგ მასაჩუსეტსის მკვიდრებს შეეძლებათ თან 28 გრამი მარიხუანა ატარონ, ხოლო სახლში 300 გრამამდე შეინახონ.

თვალსაჩინოებისთვის, აი, ეს არის 300 გრამი მარიხუანა:

ფოტო: SHANGO LAS VEGAS

მარიხუანის ლეგალიზაცია ძალაში 2016 წლის 15 დეკემბერს შევა.

კალიფორნია

ლეგალიზაციის ფარგლებში კალიფორნიელებს 28 გრამის მარიხუანის თან ტარება, ხოლო სახლში 6 ძირი მცენარის მოყვანა შეეძლებათ.

ნევადა

თან ქონის შემთხვევაში ნევადაშიც იგივე წესი მოქმედებს, ხოლო იმ მოქალაქეებს, რომლებიც მარიხუანის მაღაზიიდან 50 კილომეტრის დაშორებით ცხოვრობენ, სახლში 6 ძირის გახარების უფლება ექნებათ.

გარდა ლეგალიზაციისა, ორმა შტატმა, ფლორიდამ და ჩრდილოეთ დაკოტამ, სამედიცინო მარიხუანის ლეგალიზაციას დაუჭირა მხარი.

მეინისა და არიზონას შედეგები ჯერ-ჯერობით უცნობია.