კორონავირუსის გამო საკონსტიტუციო ცვლილებების საყოველთაო სახალხო განხილვისთვის პარლამენტი საზოგადოებრივ მაუწყებელს მიმართავს. ამის შესახებ უმრავლესობის წევრმა, ირაკლი კობახიძემ განაცხადა. მისივე თქმით,

"ბუნებრივია, საჯარო შეხვედრებს არ გავმართავთ, შესაბამისად, მივმართავთ საზოგადოებრივ მაუწყებელს, ასევე, აჭარის საზოგადოებრივ მაუწყებელს, რათა დაგვეთმოს საეთერო დრო, რომ ამ ფორმატში გაიმართოს კომისია შეხვედრა და დიალოგი-დისკუსია საზოგადოებასთან", — განაცხადა კობახიძემ.

კობახიძის განმარტებით, დადგენილია კონსტიტუციური ვადის მიხედვით, კანონპროექტის პარლამენტში განხილვის დაწყება მხოლოდ ერთი თვის გასვლის შემდეგ არის შესაძლებელი და 17 აპრილამდე კანონპროექტი საპარლამენტო ფორმატში ვერ დაბრუნდება.

მისივე თქმით, კანონპროექტის პირველი მოსმენით კენჭისყრა ყველაზე ადრე 28 აპრილს არის შესაძლებელი.

დღეს, 17 მარტს პარლამენტმა საკონსტიტუციო ცვლილებების განხილვისთვის საყოველთაო სახალხო კომისიის შექმნას მხარი დაუჭირა. კომისიის შემადგენლობა პარლამენტის პლენარულ სხდომაზე 114 ხმით დაამტკიცეს. კენჭისყრაში მონაწილეობისთვის, ოპოზიციის წევრებმა ბოიკოტი ერთი დღით დაარღვიეს, თუმცა კენჭის ყრის შემდეგ სხდომათა დარბაზი დატოვეს.

8 მარტს ოპოზიცია და მმართველი გუნდი საპარლამენტო არჩევნების 120/30-ზე სისტემით ჩატარებაზე შეთანხმდნენ. რაც იმას გულისხმობს, რომ 2020 წლის არჩევნებში პროპორციული სიით 120 დეპუტატი აირჩევა, მაჟორიტარულით კი — 30.

გაიგეთ მეტი: