დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

საქართველოს კათოლიკოს-პატრიარქის გადაწყვეტილებით, 15 იანვრიდან საქართველოში და საზღვრებს გარეთ მოქმედ ტაძრებში 12:00 საათზე ზარები დაირეკება. საპატრიარქო მრევლს მოუწოდებს ერთად თქვან ლოცვები: "მამაო ჩვენო", "ღვთისმშობელო ქალწულო" და "მოწყალებისა კარი განგვიღე", ხოლო ვინც არ იქნება ეკლესიაში, "სადაც არის, იქიდან შემოუერთდეს იმავე ლოცვით, რათა ერთობითა და ერთსულოვნებით შევავედროთ უფალს მთელი მსოფლიო, საქართველო და ჩვენი ოჯახები". ეს გაგრძელდება "ვიდრე ქვეყანაში რთული მდგომარეობაა".

ამის შესახებ კორონავირუსთან დაკავშირებით საქართველოს საპატრიარქოს მორიგ განცხადებაშია აღნიშნული.

ლოცვასთან დაკავშირებით ილია მეორე მორწმუნეებს კიდევ ერთი თხოვნით მიმართავს - ყოველდღიურად წაიკითხონ ყოვლადწმინდა ღვთისმშობლის დაუჯდომელი, რომელსაც, საპატრიარქოს განცხადებით, "არაერთგზის უხსნია ხალხი დიდი განსაცდელისგან.

საპატრიარქო მრევლს ასევე ურჩევს, ხშირად გამოიყენონ ნაკურთხი წყალი, როგორც დასალევად (უზმოზე), ასევე საცხოვრებელი და სამუშაო ადგილის საპკურებლად".

"შეგახსენებთ იმასაც, რომ გულში შეძლებისდაგვარად თქვათ "იესოს ლოცვა" ან მოკლედ, - "უფალო შემიწყალე", - მიმართავს საპატრიარქო მრევლს.

ამასთან, განცხადებაში მითითებულია, რომ სასურველია, წირვის შემდგომ მოძღვრებმა შეასრულონ ლიტანიობა და "ნაკურთხი წყალი ასხურონ ეკლესიის მიმდებარე ტერიტორიასა და ქუჩებს".

რაც შეეხება იმ რეკომენდაციებს, რომლებსაც ჯანმრთელობის მსოფლიო ორგანიზაცია და დაავადებათა კონტროლის ცენტრი ავრცელებენ, საპატრიარქოს განცხადებაში აღნიშნულია, რომ მათ სამოქალაქო პასუხისმგებლობა ავალდებულებს "ამ მითითებების გათვალისწინებას". ამიტომ, ეკლესია მრევლს მოუწოდებს, თავი შეიკავონ საზღვარგარეთ წასვლისგან, მათ შორის მოსალოცად, ხოლო გაზრდილი რისკის ქვეყნებიდან ჩამოსულებმა განსაკუთრებით დაიცვან იზოლაციის წესი. საპატრიარქოში აღნიშნავენ, რომ პასუხისმგებლობით უნდა მოიქცნენ ისინიც, ვინც გრიპით, ან გრიპის მსგავსი ვირუსით არიან დაავადებულნი და სახლებში დარჩნენ.

"სურვილის შემთხვევაში მათ მოძღვარი ბინაზე აზიარებს", - აღნიშნულია საპატრიარქოს განცხადებაში.

ამავე განცხადებით ცნობილი გახდა, რომ ქვეყანაში კორონავირუსის გავრცელების გამო, ზიარების შემდგომ პროცედურაში ერთჯერადი ან საკუთარი ჭიქის გამოყენება იქნება შესაძლებელი.

დღეს, 14 მარტს საქართველოში კორონავირუსით ინფიცირების კიდევ 5 შემთხვევა დადასტურდა და ინფიცირებულების რაოდენობა 30-მდე გაიზარდა. საქართველოში მესამეული ანუ შიდა გადაცემის პირველი შემთხვევა დადასტურდა.

პანდემია და რეკომენდაციები

საქართველოში კორონავირუსით ინფიცირების 30 შემთხვევაა დადასტურებული. მას შემდეგ, რაც ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად გამოაცხადა, საქართველოს მთავრობა მუშაობის საგანგებო რეჟიმზე გადავიდა და ახალი შეზღუდვები და რეკომენდაციები გაავრცელა.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: