6 ოქტომბერს სომხეთის პარლამენტში მმართველ პარტია სამოქალაქო შეთანხმებისა და ოპოზიციური პარტიის ძლიერი სომხეთის დეპუტატები ჯერ სიტყვიერად, შემდეგ კი ფიზიკურად დაუპირისპირდნენ ერთმანეთს.

სხდომის დღის წესრიგში შეტანილი იყო კანონპროექტი, რომელიც სომხურ სამოციქულო ეკლესიაში შექმნილი კრიზისის შემსწავლელი საგამოძიებო კომისიის წევრთა რაოდენობის განსაზღვრას ეხებოდა. ოპოზიცია აღნიშნულ ინიციატივას არაკონსტიტუციურად მიიჩნევს.

ოპოზიციონერმა დეპუტატმა ედგარ ყაზარიანმა გამოსვლისას პარლამენტის სპიკერი რუბენ რუბინიანი სახელმწიფო სახსრების გაფლანგვაში დაადანაშაულა და კოლეგებს მოუწოდა, არ დაეხარჯათ პრემიის სახით მიღებული 250 ათასი დრამი.

რუბინიანმა ყაზარიანს სიტყვა შეაწყვეტინა, მიკროფონი გამოურთო და განაცხადა, რომ დეპუტატმა დღის წესრიგს გადაუხვია. ამის შემდეგ დარბაზში ვითარება დაიძაბა — მმართველი გუნდისა და ოპოზიციური პარტიის დეპუტატები ერთმანეთს ფიზიკურად დაუპირისპირდნენ.

სპიკერმა შესვენება გამოაცხადა და დარბაზში სახელმწიფო დაცვის სპეციალური სამსახურის თანამშრომლები გამოიძახა.

ჩხუბის ადგილზე თავად რუბინიანი და ოპოზიციონერი ვიცე-სპიკერი არამ ვარდევანიანიც მივიდნენ. სომხური მედიის ცნობით, მხარეები დიდხანს ვერ მშვიდდებოდნენ. დაცვის სამსახურის თანამშრომლებმა დეპუტატების დარბაზიდან გაყვანა ძალის გამოყენებით მოუწიათ.