დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

საქართველოს მართლმადიდებელი ეკლესიის საპატრიარქო კორონავირუსთან დაკავშირებით განცხადებას ავრცელებს და მრევლს მიმართავს, ხშირად გამოიყენონ ნაკურთხი წყალი.

"ხშირად უნდა გამოიყენოთ ნაკურთხი წყალი, როგორც დასალევად (უზმოზე), ასევე საცხოვრებელი და სამუშაო ადგილის საპკურებლად. შეგახსენებთ, იმასაც, რომ გულში შეძლებისდაგვარად თქვათ “იესოს ლოცვა,“ ან მოკლედ, - "უფალო შემიწყალე". როგორც წესი, საკვების მიღების წინ და შემდგომაც უნდა ითქვას შესაბამისი ლოცვა და საჭმელს ჯვარი გადაესახოს", - აღნიშნულია განცხადებაში.

საპატრიარქო ასევე ამბობს, რომ ჯანდაცვის მსოფლიო ორგანიზაციისა და დაავადებათა კონტროლის ეროვნული ცენტრის მიერ განსაკუთრებული ზომებია მიღებული და მათ სამოქალაქო პასუხისმგებლობა ავალდებულებს "ამ მითითებების გათვალისწინებას".

ეკლესია მრევლს მოუწოდებს თავი შეიკავონ საზღვარგარეთ წასვლისაგან, "მათ შორის მოსალოცად", ხოლო გაზრდილი რისკის ქვეყნებიდან ჩამოსულებმა განსაკუთრებით დაიცვან იზოლაციის წესი. საპატრიარქოს განცხადებით, პასუხისმგებლობით უნდა მოიქცნენ ისინიც, რომელნიც გრიპით, ან გრიპის მსგავსი ვირუსით არიან დაავადებულნი და სახლებში დარჩნენ.

ამასთან, ეკლესია ამბობს, რომ "სურვილის შემთხვევაში მათ მოძღვარი ბინაზე აზიარებს".

"განსაკუთრებული ყურადღება უნდა მიექცეს პირადი ჰიგიენის დაცვას და, ზოგადად, სისუფთავეზე ზრუნვას. ასევე საჭიროა ერთმანეთთან ურთიერთობისას შემოთავაზებული წესების დაცვა", - აღნიშნულია განცხადებაში.

ამავე განცხადებით ცნობილი გახდა, რომ ქვეყანაში კორონავირუსის გავრცელების გამო, ზიარების შემდგომ პროცედურაში ერთჯერადი ან საკუთარი ჭიქის გამოყენება იქნება შესაძლებელი.