ეპიდსიტუაციიდან გამომდინარე, შეიძლება, საარჩევნო რეფორმასთან დაკავშირებული საკონსტიტუციო ცვლილებების საჯარო განხილვის ფორმატი და პლატფორმა შეიცვალოს. ამის შესახებ პარლამენტის თავმჯდომარემ, არჩილ თალაკვაძემ 11 მარტის ბიუროს სხდომაზე განაცხადა. მისივე თქმით, შემდეგ პლენარულ სხდომაზე შეიქმნება საკონსტიტუციო კომისია, რომელიც ერთი თვის ვადაში ჩაატარებს საჯარო განხილვებს. საარჩევნოი რეფორმის ახალი პროექტი საქართველოს პარლამენტში უკვე დაარეგისტრირეს.

"ის აუცილებლად ჩატარდება, გამოვიყენებთ ამისთვის რეალურ სივრცეებს თუ ტელეკომუნიკაციების საშუალებებს, თუ შევქმნით სხვა პლატფორმებს, სადაც ჩვენს მოქალაქეებს მივაწვდით ინფორმაციას და მათგანაც მივიღებთ კითხვებს. ამაზე საკონსტიტუციო კომისია იმსჯელებს იმ მოცემულობის გათვალისწინებით, რომელიც იქნება", — განაცხადა არჩილ თალაკვაძემ.

პარლამენტის თვამჯდომარე, ასევე, განაცხადა, რომ დღეს, 11 მარტს დარეგისტრირდება რეგლამენტში ცვლილებები, რომელიც შეეხება პარლამენტში საკითხების დისტანციურ განხილვასა და ელექტრონული პროცედურის შემოღებას:

"ეს კიდევ ერთხელ დაგვეხმარება, რომ მნიშვნელოვანი გადაწყვეტილება რომელიც უნდა მივიღოთ არჩევნებთან დაკავშირებით, ამ მომენტში ამას არავითარი საფრთხე არ დაემუქროს. რეგლამენტში უნდა იყოს ჩაწერილი ეს შესაძლებლობა, რათა ყველაფრისგან დავაზღვიოთ პარლამენტის მიერ გადაწყვეტილების მირების პრიცესი".

8 მარტს ოპოზიცია და მმართველი გუნდი საპარლამენტო არჩევნების 120/30-ზე სისტემით ჩატარებაზე შეთანხმდნენ. რაც იმას გულისხმობს, რომ 2020 წლის არჩევნებში პროპორციული სიით 120 დეპუტატი აირჩევა, მაჟორიტარულით კი — 30.

საპარლამენტო უმრავლესობის წევრის, ირაკლი კობახიძის თქმით, 2020 წლის არჩევნებისთვის 30 მაჟორიტარული ოლქის გადანაწილების მონახაზი უკვე შემუშავებული აქვთ. მისი თქმით, ზოგიერთი ოლქის შემთხვევაში 4-5 მუნიციპალიტეტი გაერთიანდება. კობახიძის ინფორმაციით, მაჟორიტარული ოლქიდან 18 აღმოსავლეთ საქართველოში იქნება, 12 — დასავლეთში. როგორც კობახიძე ამბობს, თბილისში 7 მაჟორიტარული ოლქი იქნება, ქუთაისში, ბათუმსა და რუსთავში თითო-თითო ოლქი.