სამხრეთ კორეის ხელისუფლებამ აქტიურად დაიწყო იმაზე ფიქრი, რომ ქვეყანაში დაბალი შემოსავლების მქონე ოჯახებს, რომლებიც სარდაფის ტიპის ბინებში ცხოვრობენ, ფინანსურად დაეხმაროს.

ამის შესახებ ინფორმაცია მას შემდეგ გავრცელდა, რაც ბონგ ჯუნ ჰოს ფილმი პარაზიტი ნამდვილ კინომოვლენად იქცა: მას ჯერ კანის ფესტივალზე გადაეცა ოქროს პალმის რტო, რითიც პირველი კორეული ფილმი გახდა, რომელმაც ეს ჯილდო მიიღო; შემდეგ კი ოსკარებზე დასახელდა წლის საუკეთესო ფილმად და პირველი არაინგლისურენოვანი ფილმი გახდა, რომელმაც ოსკარების 92-წლიან ისტორიაში ამ ნომინაციაში გამარჯვება მოახერხა.

სწორედ სარდაფის ტიპის ბინაში ცხოვრებენ ფილმის მთავარი გმირები, რომელთა სახლიც, სიუჟეტის მიხედვით, ამინდის გაუარესების შემდეგ იტბორება.

Parasite

ფოტო: Neon

კორეული მედიის ცნობით, სხვადასხვა კომპანიებთან ერთად სახელმწიფო გეგმავს, რომ თითოეულ მსგავს ოჯახს 3.2 მილიონი ვონის (რაც დაახლოებით 3 ათასი დოლარია) ფარგლებში გათბობის სისტემა დაუყენოს, იატაკი და ფანჯრები გამოუცვალოს, კონდიციონერი გადასცეს და სახანძრო სიგნალიზაცია დაუყენოს.

2015 წლის მონაცემებით, ქვეყანაში სარდაფის ტიპის 383 000 ბინაა რეგისტრირებული. ამ დახმარებით სარგებლობის უფლება კი იმ ოჯახებს ექნებათ, რომელთაც სამხრეთ კორეის საშუალო შემოსავლების 60%-ზე ნაკლები აქვთ.

როგორც ჩანს, პარაზიტი არა მხოლოდ მისი რეჟისორის, ბონგ ჯუნ ჰოსთვის, ან მხოლოდ სამხრეთ კორეული კინოსთვის, არამედ იმ ადამიანებისთვისაც სენსაციად იქცევა, ვის პრობლემებზე მოგვითხრობს ეს ფილმი სწორედ.

ასევე იხილეთ: