ელექტრონულ მუსიკაზე საუბრისას ხშირად ჩაბნელებული, დახურული, მკაცრად დაცული კლუბები გვახსენდება და თითქმის შეუძლებელია ის ისტორიულ ძეგლებთან ჰარმონიაში წარმოვიდგინოთ. კულტურაზე, ტრადიციებსა და მუსიკაზე საერთო კონტექსტში ფიქრისას კი, დიდი ალბათობით, გონებაში მხოლოდ პოლიფონიური ხალხური მელოდია გაიელვებს.

სინამდვილეში მუსიკაში "თანამედროვესა" და "ტრადიციულს" შორის ზღვარი მხოლოდ პირობითია. მათ შორის ბარიერების მოშლით და ერთი შეხედვით ურთიერთსაპირისპირო კონცეფციების შერევით კი უცხო, ინოვაციურ პროდუქტს ვიღებთ.

სწორედ ამ იდეით შეიქმნა ახალი მუსიკალური პლატფორმა GR Music, რომლის მიზანია საქართველოს უნიკალური ისტორიული ადგილების და კულტურული მემკვიდრეობის ძეგლების ფართო აუდიტორიისთვის გაცნობა ელექტრონული მუსიკის თანხლებით.

GR Music Georgian Rave-ის ახალი პროექტია, რომლის ფარგლებში ქართული ისტორიული ადგილების ფონზე ცოცხალი "სეტები" ეწყობა. საბოლოო პროდუქტი კი მსმენელამდე შთამბეჭდავი ვიდეოების სახით აღწევს. ეს დასაწყისია, სამომავლოდ კი პლატფორმის ფართომასშტაბიან ფესტივალად გარდაქმნა იგეგმება. GR Music კულტურული მემკვიდრეობის ძეგლებთან ერთად ქართველი მუსიკოსების პოპულარიზაციას ისახავს მიზნად. სწორედ ამიტომ, ის მხოლოდ ადგილობრივ შემსრულებლებს უთმობს "სცენას".

"სცენა" კი სინამდვილეში დიდ სივრცეებს გადაჰყურებს. პირველი ცოცხალი "სეტი" სამშვილდეში, ერთ-ერთ უძველეს ისტორიულ ციხე-ქალაქში მოეწყო, სადაც "მზიან ბუნებასთან შერწყმული, ჰარმონიული ხმების შემოქმედმა" — Toke-მ გასაოცარი ლანდშაფტის ფონზე შეასრულა ელექტრონული კომპოზიციები.

ისტორიული ადგილების ხელახლა აღმოჩენის მეორე სერიაში კი "სეტზე", უფლისციხეში, მიხაილო დადგა. მუსიკოსი მიხეილ თოდუა 2013 წელს 12 გრამი MDMA-სთვის დააკავეს და 9-წლიანი პატიმრობა მიუსაჯეს. საპატიმრო დაწესებულებაში მიხაილომ სტუდია მოაწყო და 8 ალბომი ჩაწერა. პრეზიდენტისგან შეწყალებაზე არაერთი უარის შემდეგ მან ციხის ადგილობრივ საბჭოს მიმართა. 6-წლიანი სასჯელის შემდეგ, 11 ოქტომბერს საპატიმრო დატოვა. იგი ახლა შინაპატიმრობაშია. უფლისციხეში მუსიკის შესრულებაც მისგან ერთგვარი გზავნილია — მიხაილომ "ერთი ციხიდან მეორე ციხეზე" გადმოინაცვლა და ახლა სრულყოფილი თავისუფლებისთვის იბრძვის.

GR Music-თვის ტექნო-სცენა, ელექტრონული მუსიკა არ დგას ისტორიისა და კულტურის საპირისპირო მხარეს, არამედ პირიქით, თანამედროვე მუსიკა ხშირად ტრადიციულისგანაა ნაკარნახევი. "ძველისა" და "ახლის" ერთ სივრცეში გაერთიანებით ორგანიზატორებს სურთ, ხაზი გაუსვან იმას, რომ ელექტრონული მუსიკა და ისტორიული ძეგლები საერთო კულტურის ელემენტებია.

GR Music მსმენელებს ელექტრონული მუსიკის თანხლებით საქართველოს წარსულსა და აწმყოში, დროსა და სივრცეში მოგზაურობას ჰპირდება. მთავარი გზავნილი კი მიღებულია — "აღმოაჩინე, შეიმეცნე და დაიმახსოვრე. მოუსმინე ჩვენი ისტორიის ექოს ადგილობრივი არტისტების ცოცხალ სეტებში".