მოძრაობა ლელოსა და თიბისი ბანკის დამფუძნებლის მამუკა ხაზარაძის განცხადებით, ფეისბუქის გამოძიებით დადასტურდა, რომ ე.წ ტროლების ქარხანას სახელმწიფო აკონტროლებს და აფინანსებს. ხაზარაძემ ჯერ კიდევ მარტში განაცხადა, რომ გამოავლინეს ტროლების ქარხანა, რომელზეც შსს-ს აცნობეს.

"თქვენ იცით, რომ მე ვიყავი ერთ-ერთი პირველი, ვინც ამხილა ტროლები და კიბერშეტევა, რომელიც მოხდა თიბისი ბანკზე. ჩვენ არამარტო ვამხილეთ, არამედ მივაწოდეთ მათ კონკრეტული მისამართები, ადამიანები, სერვერები და IP მისამრათები. ცხრა თვე გავიდა მას შემდეგ და არანაირი ძვრა არ არის", — განუცხადა მან ჟურნალისტებს.

ხაზარაძე ამბობდა, რომ ტროლების ქარხანა რუსთაველის 12 ნომერში მუშაობდა. 9 თვის წინ უწყებამ დაადასტურა, რომ ეს ინფორმაცია მიიღეს. ისინი ამბობდნენ, რომ ამოღებულია კომპიუტერები და მიმდინარეობს შესწავლა.

20 დეკემბერს ფეისბუქმა ასეულობით გვერდი და ანგარიში დაბლოკა, რომელიც მათი განცხადებით, მმართველ გუნდთან იყვნენ კავშირში და დეზინფორმაციას ავრცელებდნენ. მათი თქმით, ამ გვერდებისა და ანგარიშების რეკლამირებაში თითქმის $316 ათასი დაიხარჯა.

ფეისბუქის განცხადებაში ნათქვამია, რომ ამჟამად უკვე წაშლილი გვერდები მმართველ ძალასთან, ქართულ ოცნებასთან იყვნენ დაკავშირებულები, თუმცა თავს პარტიებად, მედიებად, რეალურ პირებად და აქტივისტთა ჯგუფებად აჩვენებდნენ.

"მიუხედავად იმისა, რომ ანგარიშების უკან მდგომი ადამიანები ცდილობდნენ, შეენიღბათ კოორდინირებული მუშაობა, კვალს სარეკლამო კომპანია პანდასთან და ქართული ოცნების ხელისუფლებასთან მივყავართ", — ნათქვამია განცხადებაში.

როგორც ატლანტიკური საბჭოს ციფრული გამოძიების კვლევის ლაბორატორია აცხადებს, გვერდები უმეტესად ქართულ აუდიტორიაზე მუშაობდნენ და ავრცელებდნენ ისეთ სოციო-პოლიტიკურ კონტენტს, რომელიც საზოგადოების პოლარიზაციას უწყობდა ხელს, თავს ესხმოდა ოპოზიციურ პარტიებსა და სამოქალაქო საზოგადოებას და საქართველოს დასავლელი პარტნიორების, კონკრეტულად კი ამერიკის შეერთებული შტატების დისკრედიტაციას ეწეოდა.