ფეისბუქის განცხადებით, იმ გვერდების რეკლამირებაში, რომლებიც სოციალურ ქსელებში პროსახელისუფლებო და ანტიოპოზიციურ პოსტებს ავრცელებდნენ, 300 000 დოლარზე მეტი არის დახარჯული. საუბარია, ასეულობით დეზინფორმაციულ გვერდსა და ანგარიშზე, რომლებიც ფეისბუქმა გუშინ, 20 დეკემბერს დაბლოკა.

"თითქმის 316 000 დოლარი დაიხარჯა რეკლამაში ფეისბუქსა და ინსტაგრამზე. ეს თანხა მოიცავს, როგორც ყალბი, ასევე, ავთენტური ანგარიშების საქმიანობის რეკლამირებას, რომლებიც კოორდინირებულად იყვნენ ჩართული არაავთენტურ ქცევაში"

ფეისბუქმა თავისი ძირითადი პლატფორმიდან ჯამში 396 გვერდი და ჯგუფი წაშალა. მათ განცხადებაში ნათქვამია, რომ ამჟამად უკვე წაშლილი გვერდები მმართველ ძალასთან, ქართულ ოცნებასთან იყვნენ დაკავშირებულები, თუმცა თავს პარტიებად, მედიებად, რეალურ პირებად და აქტივისტთა ჯგუფებად აჩვენებდნენ.

"მიუხედავად იმისა, რომ ანგარიშების უკან მდგომი ადამიანები ცდილობდნენ, შეენიღბათ კოორდინირებული მუშაობა, კვალს სარეკლამო კომპანია პანდასთან და ქართული ოცნების ხელისუფლებასთან მივყავართ", — ნათქვამია განცხადებაში.

როგორც ატლანტიკური საბჭოს ციფრული გამოძიების კვლევის ლაბორატორია აცხადებს, გვერდები უმეტესად ქართულ აუდიტორიაზე მუშაობდნენ და ავრცელებდნენ ისეთ სოციო-პოლიტიკურ კონტენტს, რომელიც საზოგადოების პოლარიზაციას უწყობდა ხელს, თავს ესხმოდა ოპოზიციურ პარტიებსა და სამოქალაქო საზოგადოებას და საქართველოს დასავლელი პარტნიორების, კონკრეტულად კი ამერიკის შეერთებული შტატების დისკრედიტაციას ეწეოდა.