თიბისი ბანკზე განხორციელებულ კიბერთავდასხმაზე მიმდინარე გამოძიების შესახებ ისაუბრა შს მინისტრის მოადგილემ, ნათია მეზვრიშვილმა და დაადასტურა, რომ უკვე ჩატარებულია გამოკითხვები და სხვა საგამოძიებო მოქმედება თბილისში, რუსთაველის 12-ში:

"ამოღებულია კომპიუტერები, მათ შორის, რუსთაველის 12-დან", — ამბობს მინისტრის მოადგილე და აღნიშნავს, რომ კოკა ყანდიაშვილი, რომელიც, სავარაუდოდ, ამავე საქმეში ფიგურირებს, ჯერ არ არის გამოკითხული: "როგორც კი ამის საჭიროება დადგება, აუცილებლად დაიკითხება".

ნათია მეზვრიშვილის თქმით, საქმე მისი კომპლექსურობიდან გამომდინარე, რთულად გამოსაძიებელია.

რუსთაველის 12-ში არსებულ ე.წ. ტროლების ფაბრიკასთან დაკავშირებით ტელეკომპანია რუსთავი 2-ზე 9 მარტს გავიდა სიუჟეტი. მამუკა ხაზარაძემ კიბერთავდასხმასთან დაკავშირებით 4 მარტს პარლამენტში გამოსვლის დროს ისაუბრა. მან მაშინაც განაცხადა, რომ ბანკის თანამშრომლებმა მიაგნეს ზუსტ მისამართსა და ოთახს, საიდანაც ეს შეტევა განხორციელდა. მისივე თქმით, ეს ოფისი თბილისის ცენტრალურ უბანში მდებარეობს და სავარაუდოდ, ის სივრცეა, საიდანაც ბოტები იმართებიან.