თუ შენ ან შენს ახლობელს გაქვთ სუიციდური აზრები, აუცილებლად უნდა დარეკოთ ფსიქოლოგიური დახმარების ცხელ ხაზზე.

მანდატურის სამსახურის ბაზაზე არსებული ფსიქოლოგიური საკონსულტაციო მომსახურების 24-საათიანი ცხელი ხაზი: 08 00 00 00 88;

ბავშვთა დახმარების ცხელი ხაზი: 116 111; 2 421 422;

ფსიქო-სოციალური მომსახურების ცენტრის ცხელი ხაზი: 2 200 220 (3025)

შინაგან საქმეთა მინისტრის მოადგილე, ნინო ცაციაშვილი აცხადებს, რომ 15 დეკემბერს გამართულ ბრიფინგზე ის ინფორმაცია მიაწოდა საზოგადოებას, რაც უწყებას იმ ეტაპზე ჰქონდა. ამის შესახებ პარლამენტში მოსმენაზე მისულმა ცაციაშვილმა განაცხადა.

მისი თქმით, ის, რომ 15 დეკემბრის ბრიფინგზე 15 წლის მოზარდზე დაკითხვისას ძალადობის ფაქტი უარყო და 17 დეკემბერს ამავე საქმეზე ჩვენების იძულების ბრალდებით გამომძიებელი დააკავეს, "ძალიანი ობიექტური მოვლენა" არის.

"დღევანდელი რეალობა რომ შეცვლილია, ეს არის ძალიან ობიექტური მოვლენა იქიდან გამომდინარე რომ მოხდა საგამოძიებო და საპროცესო მოქმედებების ჩატარება, ხვალ და ზეგ შეიძლება კიდევ დამატებით სხვა სურათი გამოიკვეთოს”, — განაცხადა ცაციაშვილმა.

კითხვაზე, უქმნის თუ არა უხერხულობას თუ არა უხერხულობას ის ფაქტი, რომ მის მიერ გაჟღერებული ინფორმაცია სიცრუე აღმოჩნდა, ცაციაშვილი პასუხობს, რომ უხერხულობას "ბრიფინგის არასწორი ინტერპრეტაციები და სპეკულაციები" უქმნის.

15 დეკემბერს გამართულ ბრიფინგზე ნინო ცაციაშვილი ამტკიცებდა, რომ ბავშვი მშობელთან ერთად გამოკითხეს და ფსიქოლოგიური ძალადობას ადგილი არ ჰქონია.

17 დეკემბერს კი სახელმწიფო ინსპექტორის აპარატმა კი გამოძიება სისხლის სამართლის კოდექსის 335-ე მუხლით დაიწყო, რაც ჩვენების მიცემის იძულებას გულისხმობს. მოზარდის გარდაცვალების შემდეგ ამ საქმეზე გამომძიებელი მარიანა ჩოლოიანი დააკავეს და 2 სამართალდამცავს უფლებამოსილება დროებით შეუჩერეს. ჩოლოიანი ბრალს არ აღიარებს.

15 წლის ლუკას საქმე

15 წლის ბიჭი, რომელიც დაკითხვის შემდეგ კორპუსიდან გადმოხტა 17 დეკემბერს გარდაიცვალა. ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

პოლიციას გამოძიების დაწყების მოთხოვნით მწვანე სკოლამ მიმართა, რომლის ტერიტორიაზეც გვიან ღამით არასრულწლოვანმა სხვადასხვა წარწერები დატოვა. გავრცელებული ინფორმაციით, ეს 15 წლის ლუკა სირაძემ გააკეთა, რომელიც მწვანე სკოლის ყოფილი მოსწავლე იყო.

საიას ინფორმაციით, დაკითხვაზე ლუკა სირაძე ყოფილ თანაკლასელს დააპირისპირეს და მასზე ფსიქოლოგიურად იძალადეს, რის შემდეგაც ის მეცხრე სართულიდან გადმოხტა. რამდენიმე დღის განმავლობაში ის კომატოზურ მდგომარეობაში იყო.