ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, სავარაუდოდ, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა. შემთხვევა 2019 წლის 11 დეკემბერს მოხდა. იგი საცხოვრებელი კორპუსის მე-9 სართულიდან გადმოხტა და ამჟამად კომატოზურ მდგომარეობაშია.

საქმეზე გამოძიება თვითმკვლელობამდე მიყვანის 115-ე მუხლით დაიწყო, რომელსაც აწარმოებს სწორედ ის განყოფილება, სადაც არასრულწლოვანზე, სავარაუდოდ, ხორციელდებოდა ძალადობა და იძულება.

საიას ცნობითვე, თვითმკვლელობის მცდელობას წინ უსწრებდა დიდუბე-ჩუღურეთის პოლიციის პირველ განყოფილებაში 2019 წლის 10 დეკემბერს (დაახლოებით 17:00-23:00 საათამდე) და 11 დეკემბერს (დაახლოებით 11:00-12:00 საათამდე) არასრულწლოვნის გამოკითხვა. მას საგამოძიებო უწყების თანამშრომლები ფსიქოლოგიური ძალადობის გამოყენებით აიძულებდნენ ეღიარებინა დანაშაული, რომელსაც იძიებდნენ, წინააღმდეგ შემთხვევაში ემუქრებოდნენ, რომ მის ძმას შეექმნებოდა გარკვეული პრობლემები, ხოლო მას დიდი ხნით დააპატიმრებდნენ.

"პოლიციელთა ფსიქოლოგიური ძალადობა და მუქარა იმდენად ინტენსიური და რეალური იყო, რომ არასრულწლოვანი შეუძლოდ გახდა გამოკითხვისას და მოითხოვა სამედიცინო დახმარების გაწევა, თუმცა აღნიშნული დახმარება მას არ აღმოუჩინეს. გამოკითხვის პროცესს ესწრებოდა არასრულწლოვნის დედაც, თუმცა გარკვეულ მომენტში არასრულწლოვანი მარტო დარჩა პოლიციის თანამშრომლებთან", — ნათქვამია განცხადებაში.

სახელმწიფო ინსპექტორის სამსახურმა პოლიციელების მხრიდან არასრულწლოვანის მიმართ ჩვენების მიცემის იძულების შესაძლო ფაქტზე გამოძიება სისხლის სამართლის კოდექსის 335-ე მუხლის პირველი ნაწილით დაიწყო.

ინსპექტორის სამსახურში აცხადებენ, რომ მიმდინარეობს შესაბამის პოლიციის განყოფილებაში განთავსებული სამეთვალყურეო ვიდეოკამერების ჩანაწერების გამოთხოვა.

საია მოუწოდებს სახელმწიფო ინსპექტორის საგამოძიებო სამსახურს, დროულად ჩაატაროს ეფექტიანი, ობიექტური და მიუკერძოებელი გამოძიება.

შინაგან საქმეთა სამინისტროში On.ge-ს განუცხადეს, რომ 10 დეკემბერს 112-ში "მწვანე სკოლის" უსაფრთხოების მენეჯერის შეტყობინება შევიდა სკოლის შიდა და გარე ტერიტორიაზე გაკეთებულ წარწერებთან დაკავშრებით.

მათ გამოძიება სისხლის სამართლის კოდექსის 187-ე მუხლის პირველი ნაწილით დაიწყეს და საგამოძიებო მოქმედებების ფარგლებში გამოიკითნენ პირები. უწყებაში ამბობენ, რომ მშობელთან ერთად გამოკითხეს არასრულწლოვანი პირი, ამავე სკოლის ყოფილი მოსწავლე, რომელმაც უარყო სკოლის კედლების მოხატვა.

შსს-ს მტკიცებით, მეორე დღეს ეს არასრულწლოვანი დამატებითი გამოკითხვის მიზნით, მშობლის ინიციატივით, მშობელთან ერთად ისევ გამოცხადდა პოლიციაში, მაგრამ მოზარდმა ისევ უარი თქვა გამოკითხვაზე. შსს-ში ამბობენ, რომ მშობლის გარეშე მოზარდი არ გამოუკითხავთ.