შვედეთის პროკურატურამ გაუპატიურების შესახებ ჯულიან ასანჟის საქმის გამოძიება შეწყვიტა. ამის შესახებ პროკურორმა, ევა-მარი პერსონმა პრესკონფერენციაზე განაცხადა.

2010 წელს ასანჟი რამდენიმე ქალმა გაუპატიურებასა და სექსუალურ ძალადობაში დაადანაშაულა, რის შემდეგაც შვედეთში გამოძიება დაიწყო. საქმის გამოძიება 2017 წელს შეწყდა, თუმცა 2019 წლის მაისში პროკურატურამ ისევ განაახლა მას შემდეგ, რაც Wikileaks-ის დამფუძნებელი დიდ ბრიტანეთში დააკავეს.

მას შემდეგ, რაც შვედეთში საქმე პირველად აღიძრა, ასანჟი ამტკიცებდა, რომ ბრალდებები სპეციალურად წაუყენეს, რათა შემდგომში აშშ-ს გადასცენ, სადაც მას პენტაგონისა და სვა უწყებების საიდუმლო მასალების გამოქვეყნებისთვის ბრალდებები ელოდებოდა. ამავე წელს ასანჟი ლონდონის პოლიციის განყოფილებაში მივიდა, სადაც ის დააკავეს, თუმცა სასამართლომ ცხრადღიანი პატიმრობის შემდეგ გირაოს სანაცვლოდ გაათავისუფლა. შემდეგ მას გირაოს პირობების დარღვების გამო 50-კვირიანი პატიმრობა შეუფარდეს.

ასანჟის შვედეთის ხელისუფლებისთვის გადასაცემად 2012 წელს ლონდონის სასამართლომ დაკავების განჩინება გასცა. ასანჟმა თავი ლონდონში ეკვადორის საელჩოს შეაფარა, სადაც 2019 წლის 11 აპრილამდე იმყოფებოდა. პოლიციამ ასანჟი მას შემდეგ დააკავა, რაც ეკვადორმა მას საელჩოში თავშესაფრის მიცემაზე უარი უთხრა.

როგორც ეკვადორის პრეზიდენტმა, ლენინ მორენომ განმარტა, WikiLeaks-ის დამფუძნებელმა საერთაშორისო კონვენციები არაერთხელ დაარღვია, რის გამოც თავშესაფრის უფლება ჩამოართვა.