პარტია ქართული ოცნების წევრი, გიორგი კახიანი აცხადებს, რომ ისინი ნაციონალურ მოძრაობას არ მისცემენ საშუალებას, დაბლოკონ საკონსტიტუციო ცვლილებები. ამის შესახებ კახიანმა ტელეკომპანია პირველის ეთერში, ნინი ჟიჟილაშვილის რვიანში ისაუბრა:

"4 წლის განმავლობაში ნაციონალურ მოძრაობას ჰქონდა კონსტიტუციაში ნებისმიერი კარგი ცვლილების დაბლოკვის შესაძლებლობა. ისინი ახლა ამბობენ, რომ ხელისუფლების ხელში არ უნდა აღმოჩნდეს საკონსტიტუციო უმრავლესობა და სანაცვლოდ გვთავაზობენ, თვითონ მიიღონ საკონსტიტუციო ცვლილებების დაბლოკვის შესაძლებლობა. ჩვენ ამის შესაძლებლობას არ მივცემთ არავის, ყველაფერს გავაკეთებთ, რომ ეს ბოროტი იარაღი არ მოხვდეს მათ ხელში. ბოროტ იარაღად ისინი იყენებდნენ იმას, რომ მათ შეეძლოთ ნებისმიერი საკონსტიტუციო ცვლილების დაბლოკვა. თუ მათ გარკვეული მანდატები აიღეს, რაც სრულიად წარმოუდგენლად მიმაჩნია, ეს იარაღი ისევ მათ ხელში აღმოჩნდება. ამით ისინი ძალიან კარგად სარგებლობენ ვიწრო პარტიული ინტერესებისთვის, პოლიტიკური ვაჭრობისთვის და ა.შ."

გიორგი კახიანის თქმით, მოსახლეობაში არსებობს არასწორი მოლოდინი, რომ საკონსტიტუციო ცვლილებები სწრაფად განხორციელდება. როგორც ის ამბობს, ქართული ოცნება კონსტიტუციაში ცვლილებებს მხოლოდ საყოველთაო კონსენსუსის საფუძველზე მიიღებს და არაფერს არ გადაწყვეტს ერთპიროვნულად. მისი განმარტებით, სწორედ ამ პრინციპით იხელმძღვანელებს მმართველი გუნდი პრეზიდენტის არჩევის წესზე მსჯელობის დროსაც.

30 ოქტომბერს საქართველოში იმართება საპარლამენტო არჩევნების მეორე ტური, სადაც მოსახლეობამ ხმა ხელახლა უნდა მისცეს მაჟორიტარი დეპუტატობის კანდიდატებს. სწორედ ეს ხმის მიცემა გადაწყვეტს, ექნება თუ არა ქართულ ოცნებას საკონსტიტუციო უმრავლესობა პარლამენტში.