უზენაესი სასამართლოს მოსამართლეობის კანდიდატს, ქეთევან ცინცაძეს მოსამართლე მიხეილ ჩინჩალაძის უარყოფითი თვისებები არ ახსენდება. ცინცაძე წლების განმავლობაში ჩინჩალაძის თანაშემწე იყო. რაც შეეხება დადებით თვისებებს, ქეთევან ცინცაძემ აღნიშნა, რომ მიხეილ ჩინჩალაძეს აქვს მოსმენისა და პოზიციის გაზიარების უნარი.

არასამთავრობო ორგანიზაციები მიხეილ ჩინჩალაძე ე.წ. სასმართლო კლანის ერთ-ერთ ლიდერად განიხილავენ. მის თვისებებთან დაკავშირებით მოსამართლეობის კანდიდატს კითხვა კოალიცია დამოუკიდებელი და გამჭვირვალე მართლმსაჯულებისთვის წარმომადგენელმა, გიორგი მშვენიერაძემ დაუსვა.

ქეთევან ცინცაძე 2017 წლიდან იუსტიციის უმაღლესი საბჭოს დამოუკიდებელი ინსპექტორია. 2011-2017 წლებში იგი იყო ადმინისტრაციულ საქმეთა პალატის მოსამართლის თანაშემწე. 2009-2011 წლებში კი საქართველოს უზენაესი სასამართლოს ადმინისტრაციულ საქმეთა პალატის მოსამართლის რეფერენტად მუშაობდა. 2011-2017 წლებში იყო უზენაესი სასამართლოს ადმინისტრაციულ საქმეთა პალატის მოსამართლის, მათ შორის, მიხეილ ჩინჩალაძის თანაშემწე.

კოალიცია დამოუკიდებელი და გამჭვირვალე მართლმსაჯულებისთვის დამოუკიდებელი ინსპექტორის შერჩევის პროცესის გაუმჭვირვალობაზე მიუთითებდა: "ინფორმაციის სრულად დახურვა აჩენს ეჭვებს კონკურსის შედეგით საბჭოს არაჯანსაღ დაინტერესებაზე".

დამოუკიდებელი ინსპექტორის შერჩევის "გაუმჭვირვალე და დახურული პროცესის საეჭვოობაზე" მიუთითებს იუსტიციის უმაღლესი საბჭოს მონიტორინგის ანგარიში, რომელშიც ნათქვამია, რომ ქეთევან ცინცაძის ბიოგრაფიამ და მისი არჩევის "გაუმჭვირვალე პროცესმა" ეჭვი გააჩინა ინსპექტორის რეალურ დამოუკიდებლობასთან დაკავშირებით.