მამა გიორგი სხილაძის ინფორმაციით, ეპისკოპოსი, რომელმაც სტუდენტზე სექსუალურად იძალადა, პატრიარქმა დააწინაურა. მისი ცნობით, ეპისკოპოსმა სტუდენტზე ჰომოსექსუალური კავშირი სცადა.

მამა გიორგის ინფორმაციით, 1988 წლის 23 დეკემბერს თბილისის სასულიერო სემინარიაში მაშინდელი რექტორი, ეპისკოპოსი ზოსიმე შიოშვილი სტუდენტს "სოდომურად თავს დაესხა" სვეტიცხოვლის რეზიდენციაში. მისივე ცნობით, სხვა სტუდენტებმა ის ამხილეს და თანამდებობიდან გადადგომის ხელწერილი დააწერინეს.

მამა გიორგი წერს, რომ პატრიარქმა ყველა სტუდენტი, მათ შორის ძალადობის მსხვერპლიც, სასწავლებლიდან გარიცხა. რაც შეეხება ძალადობაში დადანაშაულებულს, ის პატრიარქმა ორჯერ დააწინაურა და დღემდე სინოდში, წილკნელ მიტროპოლიტად ირიცხება. მამა გიორგი ითხოვს, ყოფილი სტუდენტები დაკითხონ.

"ჩატარდეს ამ ხელწერილის ექსპერტიზა; ეკუთვნის თუ არა ის მიტროპოლიტ ზოსიმეს! თუკი ნაყალბევია, მზად ვარ, პასუხი ვაგო ცილისწამებისათვის! ეს ხელწერილი ჩემს თვალწინ დაწერა, ჩემივე თხოვნით, ამ ცრუმღვდელმთავარმა", — აღნიშნავს მამა გიორგი და გათავისუფლების წერილსაც აქვეყნებს.