თბილისში, მშრალი ხიდის მიმდებარე ტერიტორიაზე, მტკვრის მარცხენა სანაპიროზე ავტოსაგზაო შემთხვევის შედეგად ერთი ადამიანი დაიღუპა, ორი კი დაშავდა.

შინაგან საქმეთა სამინისტროში On.ge-ს უთხრეს, რომ ტოიოტას მარკის მანქანა ხეს შეეჯახა, რის შედეგადაც მგზავრი დაიღუპა, მძღოლი კი დაშავდა. მათივე ცნობით, ამ ავარიაში მონაწილეობდა კიდევ ერთი მანქანა. ის გზის სავალი ნაწილიდან გადავიდა და ბორდიურს შეეჯახა, რის შედეგადაც ერთი მგზავრი დაშავდა. შსს-ს ინფორმაციით, შეჯახების გამო დაზიანდა კიდევ ერთი მანქანა, რომელშიც არავინ იჯდა.

გამოძიება სისხლის სამართლის კოდექსის 276-ე მუხლის მეექვსე ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია.