უზენაესი სასამართლოს მოსამართლეობის კანდიდატი და საკონსტიტუციო სასამართლოს ყოფილი მოსამართლე, ლალი ფაფიაშვილი ამბობს, რომ გენდერულ კვოტირებას არ ემხრობა. ამის შესახებ მან პარლამენტში მოსმენისას განაცხადა. ფაფიაშვილი ამბობს, რომ კვოტირება ქალების წარმოჩენას ხელს უწყობს, მაგრამ "სამართლებრივი გადმოსახედიდან" მხარს არ უჭერს.

"ჩემ დროსაც იყო ამაზე საუბარი და მე ღიად ვამბობდი, რომ თანაბარი უნდა იყოს შესაძლებლობა, მაგრამ ეს არ უნდა ხორციელდებოდეს კვოტირების... ზოგადად მიმაჩნია, რომ არაა სწორი,. თუკი შესაძლებლობა ორივეს თანაბარი აქვს, ამ შემთხვევაში კვოტირების საჭიროება არ არსებობს. მაგრამ აქვე ვიტყვი, რომ ევროსაბჭოს აქვს მიღებული რეზოლუცია, სადაც მაქვს ეს პრინციპი გატარებული", — თქვა ფაფიაშვილმა.

მოსამართლეობის კანდიდატის პასუხის შემდეგ დეპუტატმა ნინო წილოსანმა თქვა, რომ მას ფაფიაშვილის პასუხი არ მოეწონა. წილოსანმა იკითხა, როგორ შეუძლია ფაფიაშვილს ისაუბროს პოზიტიურ დისკრიმინაციაზე პოზიტიური შეღავათების გარეშე, რაზეც ფაფიაშვილმა უპასუხა:

"მიმაჩნია, რომ ამისი ჩაწერა არ უნდა იყოს საჭირო. ეს ისედაც უნდა იყოს ჩვეულებრივად, შერჩევა უნდა ხორციელდებოდეს არა სქესის მიხედვით ან იმის გამო, რომ კანონი ითვალისწინებდეს, რომ ამდენი ქალი უნდა მყავდეს, არამედ იქიდან გამომდინარე, რომ ამ ქალებს სრულყოფილი რეალიზაციის შესაძლებლობა. ღია უნდა იყოს შესაბამისი სფეროები ქალებისთვისაც. მათთვისაც ისევე ადვილი უნდა იყოს პოლიტიკურ სფეროში შესვლა, როგორც ეს კაცებისთვისაა".

დღეს, 25 ოქტომბერს პარლამენტში უზენაესის მოსამართლეობის კანდიდატს, ლალი ფაფიაშვილს უსმენენ. 2007-2017 წლებში ლალი ფაფიაშვილი საქართველოს საკონსტიტუციო სასამართლოს მოსამართლე იყო, 2016-2017 წლებში კი ამავე სასამართლოს თავმჯდომარის მოადგილე. 1996-2004 წლებში ლალი ფაფიაშვილი მუშაობდა საქართველოს პარლამენტში სხვადასხვა პოზიციაზე: იყო პარლამენტის თავმჯდომარის პირველი თანაშემწე, ასევე 2004-2007 წლებში — პარლამენტის წევრი ნაციონალური მოძრაობა-დემოკრატების პარტიული სიით.

ლალი ფაფიაშვილმა განიხილა საქმე "იური ვაზაგაშვილი საქართველოს პარლამენტის წინააღმდეგ". მოსარჩელე იური ვაზაგაშვილი მიიჩნევდა, რომ მას არ შეეძლო სასამართლოში ედავა, მისი გარდაცვლილი შვილის პატივისა და ღირსების შემლახავი ცნობების გავრცელებაზე, რაც, მისი აზრით, ეწინააღმდეგებოდა სამართლიანი სასამართლოს უფლებას. საკონსტიტუციო სასამართლო არ დაეთანხმა მოსარჩელეს და სადავო ნორმები კონსტიტუციურად მიიჩნია.

2014 წელს ლალი ფაფიაშვილი მონაწილეობდა გადაწყვეტილების მიღებაში, რითაც ფსიქოსოციალური საჭიროების მქონე პირების უფლებრივი მდგომარეობა და ქმედუუნარობის ინსტიტუტი შეიცვალა, ასევე, გაუმჯობესდა ადამიანთა კონკრეტული ჯგუფის უფლებრივი მდგომარეობა.

კანდიდატი მოსამართლე იყო ერთ-ერთი იმ კოლეგიაში, რომელმაც განიხილა საქმე: ჰომოსექსუალიზმი, როგორც სისხლის დონაციის აკრძალვის საფუძველის შესახებ. სასამართლომ რეგულაცია არაკონსტიტუციურად მიიჩნია.