უზენაესი სასამართლოს მოსამართლეობის კანდიდატს, ვლადიმერ კაკაბაძეს არ აქვს პასუხი კითხვაზე, შეიძლება თუ არა არაპირდაპირი შეურაცხყოფის გამო პირს დაეკისროს სამართლებრივი პასუხისმგებლობა. ასე უპასუხა მან საქართველოს დემოკრატიული ინიციატივების თავმჯდომარის, გიორგი მშვენიერაძის კითხვას.

მშვენიერაძემ კანდიდატს განუმარტა, რომ არაპირდაპირი შეურაცხყოფა გულისხმობს ვინმესთვის შეურაცხყოფის მიყენებას ისეთ დროს, როცა ობიექტი ადგილზე არაა.

კაკაბაძე: სამოქალაქო კუთხით, ვერ ვიხსენებ, რომ შეიძლებოდეს პასუხისმგებლობა,

მშვენიერაძე: თქვენი აზრით, ზოგადად უნდა შეიძლებოდეს თუ არა?

კაკაბაძე: ანუ რა ტიპის პასუხისმგებლობა?

მშვენიერაძე: ზოგადად, სამართლებრივი.

კაკაბაძე: ამაზე ესე უცბად ვერ გაგცემთ პასუხს.

ვლადიმერ კაკაბაძე სააპელაციო სასამართლოს სამოქალაქო საქმეთა პალატის უვადო მოსამართლეა. 2006-2016 წლებში იგი თბილისის საქალაქო სასამართლოს მოსამართლე იყო.

კანდიდატს განხილული აქვს ბოლო წლებში ერთ-ერთი ყველაზე გახმაურებული ფილიპ მორისის საქმე. მოსარჩელე "თბილისის თამბაქო" ითხოვდა კომპანია ფილიპ მორისის მიერ დემპინგით მიყენებული დიდი ოდენობით მატერიალური ზიანის ანაზღაურებას. მოსამართლე ვლადიმერ კაკაბაძემ სრულად გაიზიარა მოსარჩელის პოზიცია და, შესაბამისად, სრულად დააკმაყოფილა მისი მოთხოვნები. ვლადიმერ კაკაბაძემ მოპასუხეებს, საერთო ჯამში, დაახლოებით, 92 მილიონი ლარის გადახდა დააკისრა მოსარჩელის სასარგებლოდ.

მოსამართლე ვლადიმერ კაკაბაძე წარმოადგენდა მოსარჩელეს ბიზნესმენ ფადი ასლისთან დავაში. მოსამართლემ სარჩელი აღძრა მორალური ზიანის ანაზღაურების მოთხოვნით მას შემდეგ, რაც ბიზნესმენმა მას კორუმპირებული უწოდა. მართალია, თბილისის საქალაქო და სააპელაციო სასამართლოებში მოსამართლემ მოიგო დავა, თუმცა საქართველოს უზენაესმა სასამართლომ გააუქმა ქვედა ინსტანციის სასამართლოს გადაწყვეტილება და უარი უთხრა მოსამართლე ვლადიმერ კაკაბაძეს სარჩელის დაკმაყოფილებაზე.

ამავე თემაზე: