ერაყში ხუთდღიანი ანტისამთავრობო აქციების დროს 100-მდე ადამიანი გარდაიცვალა. პარლამენტის ადამიანის უფლებების კომისიის ინფორმაციით, საპროტესტო მოძრაობების დროს ოთხი ათასამდე ადამიანი დაშავდა. გაერო ხელისუფლებას მომიტინგეების დარბევის შეწყვეტისკენ მოუწოდებს.

ეს პირველი მასშტაბური პროტესტია პრემიერ-მინისტრ ადელ აბდელ-მაჰდისთვის, რომელიც ხელისუფლებაში ერთი წლის წინ მოვიდა. მოქალაქეების შეჩერებას ხელისუფლება კომენდატის საათითა და ინტერნეტის შეზღუდვით ცდილობს.

აქციები ქვეყანაში ოქტომბრის დასაწყისში სპონტანურად დაიწყო. დემონსტრანტები ამბობენ, რომ ქუჩაში უმუშევრობის, კორუფციისა და ცუდი სახელმწიფო სერვისების წინააღმდეგ გამოდიან. სამართალდამცავები მოქალაქეების წინააღმდეგ ცრემლსადენ გაზსა და საბრძოლო ტყვიებს იყენებენ.

ერაყი ნავთობის მარაგით მსოფლიოში მეოთხე ქვეყანაა. თუმცა, მსოფლიო ბანკის, ინფორმაციით, 2014 წელს მოსახლეობის თითქმის მეოთხედის დღიური თანხა მხოლოდ 1,9 დოლარი იყო. 2018 წელს უმუშევრობამ 7,9 პროცენტს მიაღწია.

გარდა ამისა, ტერორისტულ დაჯგუფება ე.წ. ისლამურ სახელმწიფოსთან ბრძოლის შემდეგ ერაყი ამ დრომდე აღდგენას ცდილობს. 2014 წელს ე.წ. ისლამურ სახელმწიფო ქვეყნის ტერიტორიის მნიშვნელოვანი ნაწილი ეკავა. ერაყისა და მსოფლიო ბანკის მონაცემებით, ქვეყნის აღდგენისთვის სულ მცირე 88 მილიარდი დოლარია საჭირო.