პარლამენტში გასაუბრებაზე მყოფ უზენაესი სასამართლოს მოსამართლეობის კანდიდატს, თამარ ალანიას დეპუტატებმა რამდენიმე კითხვა დაუსვეს განზრახ მკვლელობის ბრალდებით დაკავებული გვანცა ყუფარაძის საქმეზე. ერთ-ერთი კითხვის პასუხად ალანიამ განაცხადა, რომ ამ საქმის ხშირად ხსენებით ყუფარაძის რეაბილიტაციის პროცესი რთულდება.

"ამ გოგონას აქვს, უფლება გააგრძელოს ამ საქმის გარეშე ცხოვრება და მისი რეაბილიტაციის უფლება, ალბათ, არსებობს. ამ საქმის ყოველ ჯერზე შეხსენებით, მემგონი, ჩვენ მას ამ უფლებას ვართმევთ".

2007 წელს 14 წლის გვანცა ყუფარაძეს კლასელის განზრახ მკვლელობის ბრალდებით 5 წლით თავისუფლების აღკვეთა და 5 წლით პირობითი მსჯავრი მიუსაჯეს. ამავე წელს სააპელაციო სასამართლომ გვანცა ყუფარაძის განაჩენი ძალაში დატოვა, ხოლო 2008 წელს უზენაესმა სასამართლომ საქმე წარმოებაში არ მიიღო.

სააპელაციო სასამართლოში არასრულწლოვანი გვანცა ყუფარაძის საქმეს განიხილავდა თამარ ალანია. ის სტრასბურგის სასამართლოში წარსადგენი მოსამართლეების შესარჩევმა კომისიამ კიდევ სამ კანდიდატთან ერთად შეარჩია, თუმცა სტრასბურგს მთავრობას მისი კანდიდატურა არ წარუდგინა. არასამთავრობო ორგანიზაციების ნაწილი აცხადებდა, რომ გვანცა ყუფარაძის მიმართ სამართლიანი სასამართლოს უფლება და უდანაშაულობის პრეზუმფცია დაირღვა. ადამიანის უფლებათა ევროპულმა სასამართლომ საქმეში გვანცა ყუფარაძე საქართველოს წინააღმდეგ დარღვევები ვერ გამოავლინა.

დღეს, 23 სექტემბერს პარლამენტში უზენაესი სასამართლოს მოსამართლეობის კანდიდატების მოსმენა დაიწყო. პარლამენტში შექმნილია სამუშაო ჯგუფი, რომლის ფარგლებში გაიმართება შეხვედრა თითოეულ კანდიდატთან. ამ ეტაპზე მოსამართლეებს იურიდიულ საკითხთა კომიტეტის სხდომაზე უსმენენ.

20-კაციანი სია იუსტიციის უმაღლესმა საბჭომ 4 სექტემბერს დაამტკიცა. სიაში აღმოჩნდა ის ხუთი "სადავო" მოსამართლე, რომელიც პარლამენტში დეკემბერში წარდგენილ 10-კაციან სიაში იყო, მათ შორის, გიორგი მიქაუტაძე, ნინო ქადაგიძე, პაატა სილაგაძე, მერაბ გაბინაშვილი, თამარ ალანია. წინა სია მმართველ პარტიაში განხეთქილების, არასამთავრობოებში კი პროტესტის მიზეზი გახდა.

ამავე თემაზე: